Forskrift om eksamen ved Høgskulen i Sogn og Fjordane.

§ 1 . Bruksområde

1. Denne forskrifta gjeld alle eksamenar der resultatet skal inngå på vitnemål eller karakterutskrift. Forskrifta gjeld alle godkjende studium ved Høgskulen i Sogn og Fjordane, også eksamenar som blir arrangert desentralisert eller nettbasert med Høgskulen i Sogn og Fjordane som eksamensansvarleg institusjon. Forskrifta regulerer også vilkår for å gå opp til eksamen.

2. Avdeling/grunneining kan vedta utfyllande reglar om særeigne forhold ved den einskilde eksamen. Slike utfyllande reglar vert fastsett i fag- eller studieplan. Utfyllande reglar må vere basert på lova og denne forskrifta.

3. Dersom denne forskrifta står i motstrid til nasjonalt fastsette rammeplanar, gjeld sistnemnde.

§ 2 . Definisjonar

1. I denne forskrifta betyr «lova» lov av 12. mai 1995 nr. 22 om universiteter og høgskoler, revidert 1. juli 2002, § 50 nr. 7.

2. Eksamen er vurdering som inngår i sluttvurdering av emne/emnegruppe eller fag. Som eksamen vert rekna alle skriftlege, munnlege, praktiske eller kunstnarlege arbeid, framføringar og prøver som gir grunnlag for fastsetjing av karakter på vitnemål eller karakterutskrift. Deleksamen er vurdering der karakteren inngår i utrekning av endeleg karakter for emne/emnegruppe eller fag.

3. Eit studium er ei sjølvstendig eining med eit innhald i samsvar med vedteken fag- eller studieplan som studenten kan få opptak til og studierett på. Eit studium fører fram til avslutta vurdering eller grad.

4. Som student vert rekna alle som gjennom opptak i samsvar med § 37, § 38 og § 39 i lova er tekne opp til eit studium ved Høgskulen i Sogn og Fjordane. Tidsavgrensing av studieretten er regulert i § 7 sjuande ledd i denne forskrifta.

5. Som privatist vert rekna alle som etter § 40 i lova melder seg til eksamen ved Høgskulen i Sogn og Fjordane utan å vere oppteken som student. Privatistar må betale semesteravgift det semesteret han melder seg til eksamen og eksamensavgift fastsett av styret. Styret fastset utfyllande reglar for privatistar.

6. Rammeplan er ein nasjonal plan som fastset mål, innhald og organisering av visse utdanningar og einskildfag som inngår i ei utdanning. Departementet fastset rammeplanar.

7. Fagplan er ein plan som gir nærare omtale av innhald, organisering og vurderingsformer i utdanningar som er omfatta av nasjonale rammeplanar. Avdeling/grunneining vedtek fagplanar. Ved innføring av ny rammeplan eller iverksetjing av ny rammeplanstyrt utdanning, kan direktøren bestemme at fagplan skal vedtakast av institusjonsstyret.

8. Studieplan er ein plan som fastset fagleg innhald, organisering, krav til obligatoriske kurs, praksis og vurderingsformer for ei utdanning eller eit studium som ikkje er omfatta av nasjonale rammeplanar. Styret for høgskulen vedtek studieplanar med omfang av 30 studiepoeng eller meir. Fullmakt til å vedta studieplanar på inntil 30 studiepoeng og oppdatere godkjende studieplanar er delegert til avdeling/grunneining.

9. Emne er den minste eininga som kan gå inn i eit fag, ei emnegruppe, eit studium eller ein grad og som kan inngå på vitnemål eller karakterutskrift. Alle emne skal ha eit omfang målt i studiepoeng.

10. Emnegruppe er ein kombinasjon av emne frå eitt eller fleire fag/fagområde som gjennom fag- eller studieplan er definert til å utgjere ei samla eining.

11. Fag er ei samling av emne som heng nært saman, og som er samla i ei fagleg nemning.

12. Emne, emnegruppe og fag er nemningar for dei delane som kan inngå på vitnemål eller karakterutskrift og som til saman kan utgjere ein grad eller ei utdanning.

13. Studiepoeng er mål på omfanget av eit studium der eit fullt studieår er normert til 60 studiepoeng.

14. Mappevurdering er vurdering av ei samling tekstar eller andre produkt som er produserte gjennom ein viss periode. Samlinga dokumenterer prosess og produkt, og syner studenten sine refleksjonar og faglege utvikling. Prosess for utveljing av kva for element i mappa som skal telje med i sluttvurderinga skal gå fram av fag- og studieplan. Styret kan fastsetje utfyllande reglar for mappevurdering.

15. Arbeidskrav er vilkår for å framstille seg til eksamen. Døme på arbeidskrav er særskilde forkunnskapar, innlevering av mappe, forprøver, obligatorisk undervisning, kurs, øvingar, ekskursjonar og praksis. Arbeidskrav skal gå fram av fag- eller studieplan og det skal eksplisitt framgå kva arbeidskrav som er vilkår for å framstille seg til eksamen. Styret kan fastsetje utfyllande reglar for arbeidskrav.

16. Diploma Supplement er eit vitnemålstillegg på engelsk, og skal synleggjere namn og personalia for studenten, informasjon om studieprogrammet vedkomande har gjennomgått og norsk utdannings- og vurderingssystem. Diploma Supplement inneheld ikkje vurdering av prestasjonar for den einskilde student. Diploma Supplement skal følgje det originale vitnemålet, og er berre gyldig i lag med dette.

17. Utdanningsplan er ein avtale mellom student og institusjon som synleggjer kva rettar og plikter høgskulen har overfor studenten, og dei rettar og plikter studenten har overfor institusjon og medstudentar. Studentar som er tatt opp til studium på 60 studiepoeng eller meir skal inngå ein utdanningsplan.

§ 3 . Vedtaksmynde

1. I saker der vedtaksmynde i denne forskrifta ikkje eksplisitt er lagt til annan instans, er det direktøren eller den han gir fullmakt som har avgjerdsrett.

§ 4 . Vurderingsformer

1. Vurderingsformer og vekting mellom ulike eksamenar eller deleksamenar som skal danne grunnlag for sluttvurdering med fastsetjing av endeleg karakter blir fastsett i fag- eller studieplan og skal godkjennast av styret, jf. lova § 46 nr. 5.

2. Eksamen skal normalt skje i form av individuell prøving. Gruppeeksamen kan gjennomførast for mindre delar av eit studium.

3. Munnleg eksamen er offentleg med mindre omsynet til gjennomføringa av eksamen eller prøva tilseier noko anna. Det kan gjerast unntak for regelen om offentleg eksamen etter ønskje frå den einskilde eksamenskandidat, dersom tungtvegande grunnar tilseier det, jf. lova § 50 nr. 3. Avdeling/grunneining sjølv gjer slike unntak.

4. Det kan gjennomførast vurdering med eigne eksamensordningar for privatistar.

§ 5 . Vurderingsskala

1. Vurderingsuttrykket ved eksamen/sluttvurdering er greidd/ikkje greidd eller karakter etter ein skala frå A til F med A som beste karakter. Karakteren F blir rekna som ikkje greidd.

2. Alle deleksamenar som skal inngå i utrekninga av ein samla karakter for eit fag eller emne vert omrekna etter følgjande verdiar: A=5, B=4, C=3, D=2, E=1. Ved utrekning av samla karakter vert det nytta vanlege matematiske opphøgingsreglar.

§ 6 . Eksamensomfang og tidsbruk

1. Omfang av dei ulike delane som utgjer eksamen eller sluttvurdering skal vere oppgitt i fag- eller studieplan i form av vekting og kor lenge eksamen varer.

2. Skriftleg skuleeksamen under tilsyn har til vanleg eit omfang på inntil 6 timar. Studentane får i tillegg 15 minutt til å klargjere eksamenssvara for innlevering. Dette inkluderer matpause.

3. Heimeeksamen kan ha eit omfang på inntil 10 dagar. Sjølvstendige arbeid som prosjektoppgåver/hovudoppgåver vert normalt gjennomført over eit lengre tidsrom.

§ 7 . Tilgjenge til eksamen. Rett til å halde fram ved eit studium

1. Studentar som fyller dei generelle og eventuelt spesielle opptakskrava og andre krav for å gå opp til eksamen i vedkomande emne eller fag har rett til å melde seg til eksamen. Dette gjeld også privatistar.

2. For å ha tilgjenge til eksamen må studenten vere registrert og meld til eksamen innan dei fristane høgskulen fastset. Studentar betaler semesteravgift i samsvar med lov og forskrift om studentsamskipnader innan fastsette fristar. Privatistar må ha betalt dei avgifter styret fastset.

3. Studentar har rett til å melde seg til eksamen utan å vere tatt opp til studiet. Avdeling/grunneining avgjer kva emne/fag som kan takast som «tilleggsfag» med bakgrunn i krav til obligatorisk undervisning og praksis. Styret kan vedta eiga eksamensavgift for desse studentane. Studentar med utdanningsplan skal ikkje betale slik avgift.

4. Dersom gjeldande fag- eller studieplan fastset særskilde arbeidskrav for å gå opp til eksamen, må slike vere gjennomført og/eller greidd før ein framstiller seg til eksamen. Det same gjeld dersom det er krav om at bestemte eksamenar skal vere avlagt før ein kan gå opp til den aktuelle eksamenen. Informasjon om slike krav og føresetnader skal gå fram av fag- eller studieplan.

5. Ein student har rett til å framstille seg til eksamen i same emne eller fag tre gonger så lenge det aktuelle faget/eksamen eksisterer. Dette gjeld også privatistar, utan at eksamensavgift må betalast på nytt. Når ein student har teke eksamen på nytt, gjeld den beste karakteren. For rettleidd praksisstudium er det berre høve til å framstille seg to gonger for kvar praksisperiode. I særlege tilfelle kan avdeling/grunneining sjølv gjere unnatak frå desse reglane.

6. Retten til å ta om att eksamenar, praksis eller arbeidskrav som er omtalt i § 7 femte ledd i denne forskrifta opphøyrer når det blir gjort endringar i fag- eller studieplan. I slike tilfelle kan siste forsøk etter gamal ordning gjennomførast eitt år etter at den gamle ordninga vart avvikla. Avdeling/grunneining avgjer om eksamen, praksis eller arbeidskrav etter gamal ordning kan innpassast og eventuelt gje fritak i forhold til ny fag- eller studieplan, jf. § 13 femte ledd.

7. Retten til å halde fram ved eit studium kan regulerast ved særskilde krav for kvart einskild studium. Slike krav blir fastsette av avdeling/grunneining og skal gå fram av studie- eller fagplan.

8. Ein student kan vere registrert ved eit studium inntil to gonger normert studietid, avgrensa oppover til to år lenger enn normert. Etter denne tid misser studenten dei rettar som følgjer med opptaket. Semesteravgift må vere betalt innan fastsett frist det semesteret studenten ynskjer å framstille seg til eksamen. Studieretten opphøyrer når ein student har brukt opp alle forsøk på å greie ein eksamen eller praksisperiode. Studieretten kan også gå tapt på grunn av forhold som er omtalt under § 7 sjuande ledd. Studentar som ikkje følgjer normert studieprogresjon, må til ei kvar tid forhalde seg til gjeldande fag- eller studieplan og dei eksamensordningar som følgjer av denne. Studentar kan etter søknad få innvilga permisjon frå utdanninga. Direktøren fastset permisjonsreglement.

§ 8 . Fritak og innpassing

1. Ein student skal få fritak frå eksamen eller arbeidskrav når det kan godtgjerast at tilsvarande eksamen eller arbeidskrav er greidd ved same eller annan institusjon, eller på bakgrunn av dokumentert realkompetanse, jf. lova § 49. Det skal også gjevast innpassing eller fritak på grunnlag av grad, yrkesutdanning, fag, emne eller emnegruppe tatt ved annan norsk eller utanlandsk institusjon, jf. lova § 47 og § 48.

2. Søknad om fritak i samsvar med lova § 49 blir avgjort av styret eller den avdeling/grunneining som har fagleg ansvar for den aktuelle eksamen eller arbeidskravet det blir søkt fritak for. Søknad om innpassing, jf. lova § 47, blir avgjort av styret for den avdeling/grunneining som har ansvar for vedkomande studium. Presedenssaker blir avgjort av direktøren.

3. Når det vert gjeve fritak eller innpassing, har vedtaksorganet ansvar for å sjå til at det ikkje vert gjeve dobbel utteljing for same faginnhald, men at studenten vert godskriven med same tal studiepoeng som vedkomande har tatt ved annan institusjon. Eventuell reduksjon i tal studiepoeng i andre fag skal framgå av vedtaket.

4. Søknad om fritak for eksamen eller arbeidskrav skal leverast så tidleg som mogeleg i utdanninga og seinast innan frist for oppmelding til eksamen i det semesteret den aktuelle eksamen eller arbeidskravet skal avleggjast.

5. Fritak for eksamen skal gå fram på vitnemål og karakterutskrift, med merknad om på kva grunnlag fritaket er gjeve.

§ 9 . Eksamen under særlege vilkår

1. Studentar som av medisinske eller andre grunnar har behov for særordning i samband med eksamen, må søke om dette innan dei fastsette fristane for eksamensoppmelding. Ved akutte lidingar som oppstår etter denne fristen, må søknad sendast snarast råd er. Behovet må dokumenterast med legeattest eller attest frå andre sakkunnige. Attestasjonen må innehalde ein spesifikasjon av kva for særordning studenten har behov for ved eksamen. Det skal søkjast for kvar eksamensperiode. Dersom grunnlaget for særordning er av permanent karakter, kan det gjerast vedtak for ein lengre periode, avgrensa til eitt studieår. Direktøren avgjer søknader om særordning ved eksamen etter tilråding frå avdeling/grunneining.

2. Særordning kan gjevast m.a. til studentar som har kroniske eller akutte lidingar, fysiske funksjonshemmingar, gravide som har behov for kvile, mødre som ammar, studentar med lese-/skrivevanskar eller som har norsk som framandspråk.

3. Særordning kan gjevast i form av spesiell fysisk tilrettelegging, særskilde hjelpemiddel, utvida tid til eksamen og vedlegg av attestasjon med eksamenssvaret. Det kan løyvast inntil 1 time utvida eksamenstid ved skuleeksamen. Ved heimeeksamen kan det gjevast inntil 24 timar utvida tid. Laurdag og søndag tel som vanlege dagar.

4. Ved særlege omstende (sjukdom og andre sterke velferdsgrunnar) kan studentar få høve til å avleggje eksamen andre stader. Studentane må dekkje alle ekstrautgifter i samband med den desentraliserte eksamensavviklinga. Studentar ved andre høgskular/universitet må som hovudregel ha sterke velferdsgrunnar for å kunne ta eksamen ved HSF. Direktøren avgjer slike søknader, og kan fastsetje eiga avgift for å arrangere slike eksamenar.

5. Direktøren kan fastsette utfyllande reglar om særordning ved eksamen.

§ 10 . Bruk av hjelpemidlar under skuleeksamen

1. Avdeling/grunneining avgjer kva type hjelpemiddel som er lovlege ved skuleeksamen. Oversyn over lovlege hjelpemiddel ved skuleeksamen skal vere oppført for kvart einskild emne eller fag i fag- eller studieplan, og det skal tydeleg gå fram av eksamensoppgåva. Eventuell kontroll av lovlege hjelpemiddel ved skuleeksamen er den einskilde avdeling/grunneining sitt ansvar.

2. Hjelpemiddel under skuleeksamen kan omfatte skrivne og trykte hjelpemiddel, kalkulator, teikneutstyr m.m. Dersom det er tillate med trykte hjelpemiddel, skal dei vere frie for private notatar utanom lovlege referansar og markeringar. I eksamenslokalet er det ikkje tillate å ha med utstyr som kan nyttast til å opprette samband eller på anna vis kommunisere internt i eksamenslokalet eller med omverda.

3. Bruk av ulovlege hjelpemiddel blir sett på som fusk. Har studenten ulovlege hjelpemiddel til disposisjon etter at eksamen er sett i gang, blir det sett på som forsøk på fusk.

§ 11 . Oppmelding til eksamen

1. Studentar som er registrerte og har betalt semesteravgift blir automatisk oppmelde til obligatoriske eksamenar (første gongs eksamen) som inngår i studiet. Studentar som ikkje følgjer normert studieløp har sjølve ansvar for å melde seg på eller av eksamen. Det same gjeld oppmelding til eksamen i valfag og til ny eksamen.

2. Oppmeldinga gjeld for eitt semester og skal skje innan 15. september i haustsemesteret og 15. februar i vårsemesteret. Privatistar har tilsvarande oppmeldingsfristar. Frist for oppmelding til eksamen utanom eksamensperiodane er ein månad før eksamen startar. Det vert sett eigne fristar for innlevering av arbeid/gjennomføring av praktiske øvingar og framføringar som skal inngå i mappevurdering.

3. Planlagd studieprogram og studieprogresjon skal gå fram av utdanningsplanen for den einskilde student. Studenten har ansvar for å registrere endringar i utdanningsplanen som gjeld eksamen innan fastsette fristar.

4. Ein student som ynskjer å trekkje seg frå eksamen, må melde skriftleg frå om dette seinast to veker før eksamen startar. Same regel gjeld for sluttvurdering som ikkje inneheld ein skriftleg skuleeksamen. Den som trekkjer seg frå eksamen etter fastsett frist og som ikkje har gyldig grunn til det, blir rekna for å ha framstilt seg til eksamen. Gyldig grunn er sjukdom eller sterke velferdsgrunnar som skal vere stadfesta av sakkunnige. Direktøren avgjer kva som er gyldig fråværsgrunn.

5. Studenten har sjølv ansvaret for å kontrollere at han eller ho er oppmeld til rett eksamen, korrigere eventuelle feil, og til å halde seg orientert om tid og stad for eksamen. Høgskulen pliktar å opplyse om tid og stad for eksamen seinast ei veke før eksamen tek til.

§ 12 . Tidspunkt for eksamen

1. Eksamensplan med tidspunkt for skuleeksamen skal vere fastsett ved oppstart av det semesteret eksamen skal føregå. Ny eksamen skal vere kunngjort seinast tre veker før eksamen blir arrangert.

2. Skuleeksamen vert normalt arrangert ved utgangen av det semesteret undervisninga i faget vert avslutta og innanfor fastsett eksamensperiode. Direktøren fastset eksamensperiode. Når faglege omsyn tilseier det, kan eksamen leggjast til andre tider av året.

3. Fristar for innlevering av oppgåver og tidspunkt for gjennomføring av praktiske prøver/framføringar som skal inngå i mappe for sluttvurdering skal fastsetjast av avdeling/grunneining ved oppstart av det semesteret innleveringar og prøver/framføringar skal føregå. Direktøren kan fastsetje utfyllande retningsliner for mappevurdering.

4. Innanfor ein eksamensperiode vert same eksamen berre arrangert ein gong.

5. Studentar som følgjer ordinær studieplan og normert studieprogresjon skal ha minst ein dag mellom kvar eksamensdag. Det kan gjerast unnatak for valfag.

§ 13 . Ny eksamen

1. Ny eksamen er mappevurdering og/eller eksamen som vert arrangert for studentar som har godkjend grunn for fråvær ved ordinær eksamen eller som strauk ved siste ordinære eksamen. Eventuelt fråværsgrunnlag skal vere dokumentert og skriftleg stadfesta, og skal leverast høgskulen så raskt som mogeleg og seinast ei veke etter at eksamen/sluttvurdering har funne stad. Studentar som har godkjend grunn for fråvær blir rekna som ikkje å ha framstilt seg til eksamen.

2. Vanlegvis vert ny eksamen arrangert ved utgangen av påfølgjande semester. Ved nokre utdanningar, der greidd eksamen er ein føresetnad for oppflytting til neste semester eller studieår, vert ny eksamen arrangert før eller i samband med oppstart av nytt semester/studieår. Det kan ikkje arrangerast meir enn ein ny eksamen i eitt og same fag i same semester.

3. Studentar som strauk eller hadde gyldig grunn til ikkje å levere mappe som grunnlag for sluttvurdering skal ha tilbod om å levere ny mappe innan utgangen av påfølgjande semester.

4. Ved ny eksamen skal det vere same pensum og vurderingsform som ved ordinær eksamen.

5. Studentar som ikkje møter til ordinær eksamen utan godkjend grunn, og studentar som ynskjer å betra karakter, har ikkje høve til å melde seg til ny eksamen. Dei må melde seg ved neste ordinære eksamen.

6. Når fag- eller studieplan vert endra, blir siste eksamen etter gamal ordning arrangert eitt år etter at den gamle ordninga vart avvikla. I slike tilfelle er eksamen open for alle registrerte studentar som fyller vilkåra for å framstille seg til den aktuelle eksamen. Dersom ein kandidat har godkjent sjukefråvær når slik eksamen blir arrangert, og vedkomande ikkje har greidd den aktuelle eksamen, kan det etter søknad arrangerast endå ein ny eksamen etter gamal ordning. Avdeling/grunneining avgjer slike søknader.

§ 14 . Fusk, annullering av eksamen, bortvising

1. Lovlege hjelpemiddel ved skuleeksamen er omtalt under § 10. Dersom det under eksamen oppstår mistanke om fusk eller forsøk på fusk, skal studenten straks gjerast merksam på at dette vil bli rapportert. Det gjeld også student som eventuelt yter hjelp. Studenten vel sjølv om ho/han vil halde fram eller avbryte eksamen.

2. Ved heimeeksamen og skriftlege arbeid som inngår i mappevurdering kan kopiering eller avskriving av litteratur utan tilvisingar bli vurdert som fusk.

3. Fusk eller forsøk på fusk ved eksamen medfører at eksamen for vedkomande student kan bli annullert. Fusk eller forsøk på fusk ved eksamen kan medføre bortvising frå den aktuelle eksamen, jf. lova § 54 og § 42. Direktøren avgjer slike saker.

4. Studentar som blir tekne i fusk eller forsøk på fusk ved eksamen, kan utestengjast frå institusjonen og fråtakast retten til å gå opp til eksamen ved institusjonar under lova i inntil eitt år. Retten til å annullere eksamen vert ikkje forelda. Andre institusjonar under lova kan informerast om annullering av eksamen. Styret sjølv eller styrets klagenemnd avgjer slike saker.

5. Studentar som unnlet å rette seg etter høgskulen sine retningsliner for eksamenskandidatar, kan visast bort frå eksamenslokalet.

6. Studiesjef er ansvarleg for handsaming av saker om fusk ved eksamen.

§ 15 . Sensur

1. Alle eksamenar/sluttvurderingar i emne eller fag som skal inngå på vitnemål eller karakterutskrift skal vere sensurert av minst to sensorar.

2. Det skal vere to sensorar, der ein er ekstern, ved minst ein deleksamen som inngår i eksamen/sluttvurdering for eit studium normert til 60 studiepoeng.

3. Det skal vere to sensorar, der ein er ekstern for minimum ein eksamen i kvart studieår i fleirårige utdanningar, grads- og kandidatstudium og ved vurdering av kandidatar sitt sjølvstendige arbeid i høgre grad.

ekstern sensor deltek i sluttvurdering/eksamen for alle kandidatane etter ein fastsett plan ekstern sensor evaluerer vurderingsformene slik dei kjem til uttrykk i fag- og studieplanar, eksamensoppgåver og eventuelle sensorrettleiingar ekstern sensor deltek ved vurdering av eit tilfeldig utval eksamensoppgåver (stikkprøver).

5. Ved vurdering av praksisopplæring o.l. skal faglærar ved høgskulen og rettleiar på praksisstaden vurdere studenten til «greidd» eller «ikkje greidd» praksis. Studenten har krav på vurdering undervegs. Dersom det er tvil om ein student vil få godkjend ein praksisperiode, skal studenten i tillegg til vanleg rettleiing også få ei førebels skriftleg vurdering. Denne skal gjevast så tidleg som mogleg og seinast tre veker før praksisperioden etter planen skal vere avslutta. Ved praksisperiodar som varer fem veker eller mindre, skal varsel gjevast midtvegs i perioden. Denne vurderinga skal klart gjere greie for vurderinga så langt og eventuelle vilkår for «greidd» praksis ved sluttevaluering. For einskilde studium kan det vere andre former for vurdering av praksis. Avdeling/grunneining fastset slike vurderingsformer i fag- eller studieplan.

6. Avdeling/grunneining oppnemner sensorar. Klagekommisjon blir oppnemnd samstundes med ordinær kommisjon.

vere tilsett på minimum høgskulelektornivå ved annan utdannings- eller forskingsinstitusjon. på anna måte ha dokumentert vitskapeleg kompetanse på tilsvarande nivå. ha røynsle som sensor i vedkomande fag, emne eller kurs ved universitet eller høgskule. gjennom yrkespraksis vere særleg kvalifisert innan vedkomande fag.

Den som tek på seg sensoroppdrag, tek samstundes på seg å vere sensor ved eventuell ny eksamen i faget, emnet eller kurset.

8. Dersom dei to sensorane ikkje blir samde om vurderinga av eit eksamenssvar, skal vurderinga overlatast til ein tredje sensor til avgjerd. Dette skal vere ein ekstern sensor. Den nye sensoren har rett til å gjere seg kjend med dei første sensorane si vurdering og eventuelle grunngjeving.

9. Sensurfrist er 15 yrkedagar frå innleveringsdato for eksamenssvaret. Styret sjølv kan gjere unntak frå dette kravet på visse vilkår, jf. lova § 50 nr. 4. I emne eller fag der eksamen/sluttvurdering er sett saman av fleire delar: skriftleg eksamen og/eller mappevurdering og ein munnleg prøve, og munnleg prøve fungerer som grunnlag for å justere karakter frå skriftleg eksamen og/eller mappevurdering, skal sensur frå skriftleg eksamen/mappevurdering liggje føre før munnleg prøve tek til. Ein student som ikkje har greidd skriftleg eksamen/mappevurdering, kan ikkje framstille seg til munnleg prøve.

10. Reglar for utrekning av endeleg karakter på grunnlag av fleire deleksamenar i eit emne eller fag skal framgå av fag- eller studieplan. Det same gjeld dersom det er bestemte vilkår for å framstille seg til deleksamenar, eller at dei må vere greidd i ei bestemt rekkjefølgje. Alle deleksamenar må vere gjennomført før det kan gjevast endeleg karakter.

11. Ved mappevurdering skal fag- eller studieplan gjere greie for om mappa skal vurderast med ein samla karakter, eller om det skal gjevast karakter for ulike delar. Det skal vidare gå fram om ein student som stryk i delar av mappa må ta heile mappa på ny, eller om han må ta om att dei delane han strauk i.

12. Karakterfastsetjinga er i utgangspunktet individuell også ved gruppeeksamen. Denne regelen er tiltenkt situasjonar der det kan dokumenterast eller sannsynleggjerast at ein eller fleire medlemer av gruppa ikkje har bidrege til eksamenssvaret slik det var føresett. I slike tilfelle kan avdeling/grunneining sjølv avgjere at det skal avviklast munnleg eksaminasjon for den gruppa det gjeld med sikte på individuell fastsetjing av karakter, sjølv om dette ikkje var føresett i fag- eller studieplan. Slik eksaminasjon vert rekna som eksamen i forhold til lova og forskrifta sine reglar. I slike tilfelle vert sensurfristen utsett til den munnlege eksaminasjonen er avvikla.

13. Sensur skal gjerast kjent ved oppslag og elektronisk kunngjering. Sensurlistene skal vere anonyme.

§ 16 . Grunngjeving og klage

1. Når det gjeld retten til å klage på formelle feil eller fastsetjing av karakter ved eksamen, gjeld § 51 og § 52 i lova. Alle klager skal vere skriftleg grunngjevne, og dei skal rettast til høgskulen. Klage på formelle feil må setjast fram innan tre veker etter at studenten er eller burde vore kjent med det forhold som grunngjev klaga.

2. Ved klage over formelle feil, kan direktøren avgjere at klaga skal takast til følgje dersom det er opplagt at klaga er rettkomen, og det påklaga forholdet berre kan ha hatt konsekvensar for klagaren. I anna fall eller dersom klagaren ikkje får medhald, skal saka handsamast av styret si klagenemnd. Styret eller styret si klagenemnd kan gjere vedtak om ny sensurering eller annullering av eksamen sjølv om det ikkje er framsett klage. Styret fastset eigen instruks for klagenemnda.

3. Studenten har rett til å få skriftleg eller munnleg grunngjeving for sensurvedtaket. Ved munnleg eksamen eller vurdering av praktisk dugleik, må krav om grunngjeving setjast fram straks sensurvedtaket er gjort kjent. Ved anna vurdering må krav om grunngjeving framsetjast innan ei veke frå studenten fekk kjennskap til sensurvedtaket, og aldri meir enn tre veker etter at sensurvedtaket vart gjort kjent. Grunngjeving skal normalt gjevast innan to veker etter at kravet er framsett. Sensorane avgjer seg imellom kven som skal gje grunngjevinga.

4. Dersom det er utarbeidd skriftlege retningsliner eller sensorrettleiingar for vurderingsarbeidet skal desse gjerast tilgjengelege for studentane for gjennomsyn etter at sensurvedtaket er fastsett.

5. Ein student kan klage skriftleg over sensurvedtaket innan tre veker etter at vedtaket er kunngjort, jf. lova § 52 nr. 4. Klaga skal vere fagleg grunngjeven, og går direkte til klagekommisjon for ny sensur.

6. Ved mappevurderingar under vegs i studiet har studenten klagerett over fastsetjing av karakter når samla vurdering av emne eller fag er kunngjort.

7. Ved klage på sensurvedtak som gjeld gruppeoppgåve//-eksamen, må alle som er omfatta av sensurvedtaket skrive under på klaga. Klage på gruppekarakter som inneber krav om individuell karakterfastsetjing, skal handsamast etter reglane i § 15 tolvte ledd.

8. Klagekommisjonen utfører ei full overprøving av det påklagde sensurvedtaket. Endring kan skje til gunst eller ugunst for klagaren, jf. lova § 50 nr. 5. Klagekommisjonen skal ikkje ha tilgang til andre opplysningar enn dei første sensorane. Klagekommisjonen sitt vedtak skal liggje føre innan tre veker etter at klagefristen er ute.

9. Munnleg eksamen og andre prøveformer som vanskeleg kan etterprøvast, kan berre påklagast på grunnlag av formelle feil. Når det blir halde munnleg eksamen i tilknyting til skriftleg eksamen, og det deretter vert sett ein felles karakter på den samla prestasjonen, er det berre den skriftlege delen av eksamen som kan påklagast. Dersom sensurvedtaket blir endra, må det haldast ny munnleg eksamen for fastsetjing av endeleg karakter.

§ 17 . Reduksjon av studiepoeng

1. Dersom ein student tek eksamen i fleire emne eller fag som heilt eller delvis overlappar kvarandre, skal det normalt føre til reduksjon av studiepoeng. Reduksjon blir gjort i det emnet eller faget som gjev det gunstigaste resultatet for studenten. Fagleg overlapping mellom høgskulen sine eigne studietilbod skal normalt gå fram av fag- eller studieplan og studiehandbok. Avdeling/grunneining avgjer spørsmål om reduksjon av studiepoeng.

§ 18 . Vitnemål og karakterutskrift

1. Det vert skrive ut vitnemål og Diploma Supplement for avslutta grad eller utdanning i samsvar med kongeleg resolusjon. For andre studium eller einskildeksamenar tildeler høgskulen karakterutskrift.

2. Studentar som har fått fritak etter § 49 i lova, og som tilfredsstiller krava til fullført grad eller utdanning, kan få vitnemål dersom eksamen i fag/emne/emnegruppe/studium av eit samla omfang på minst 60 studiepoeng er teke ved høgskulen.

3. Normalt blir det utskrive berre eitt vitnemål per student. Dersom ein student betrar karakterar som inngår på vitnemålet, kan studenten krevje å få utskrive nytt vitnemål. Tidlegare utskrive vitnemål må då innleverast. I særlege tilfelle der det kan dokumenterast eller sannsynleggjerast at vitnemålet er kome bort, kan det skrivast ut nytt vitnemål utan innlevering. Slikt vitnemål skal ha påskrifta «duplikat», og både opphavleg utskrivingsdato og ny dato skal framgå.

namn og fødselsnummer kva grad eller utdanning som er oppnådd tidspunkt for fullført utdanning namn, studiepoeng og karakter for emne/emnegruppe eller fag som er gitt avsluttande vurdering og som går inn i studiet når dei einskilde eksamenane er avlagt kva emne/emnegruppe eller fag studenten eventuelt har fått innpassing eller fritak for tittel på større skriftlege oppgåver praksis kva vurderingsskala som er nytta.

5. Det skal gå fram av vitnemålet dersom ein kandidat som går opp til eksamen utan å vere tatt opp til eit studium, jf. lova § 40 nr. 1, har blitt vurdert etter annan eksamensordning enn den som gjeld for studentar som er tatt opp til studiet.

6. Deleksamenar som inngår i sluttvurdering av emne eller fag skal normalt ikkje spesifiserast på vitnemålet.

7. Det vert gitt karakterutskrift for eksamenar som er greidd og som utgjer del av ein grad eller utdanning eller kjem i tillegg til grad eller utdanning.

8. På førespurnad vert det utskrive karakterutskrift på engelsk.

9. Vitnemål skal vere utskrive i høgskulen sitt namn. Vitnemål skal underskrivast av rektor og studiesjef. Denne fullmakta kan delegerast både i fagleg og administrativ line.

§ 19 . Retningsliner for gjennomføring av eksamen

1. Styret gjev direktøren fullmakt til å vedta retningsliner for den praktiske gjennomføringa av eksamen, slik som retningsliner for eksamenskandidatar, eksamensvakter, ansvarlege faglærarar, sensorar og eksamensansvarleg. Direktøren får vidare fullmakt til å vedta eigne retningsliner for digital eksamensavvikling inkludert innlevering av oppgåver over Internett.

§ 20 . Iverksetjing

1. Denne forskrifta opphevar forskrift av 24. juni 1999 nr. 777 om eksamen ved Høgskulen i Sogn og Fjordane, og gjeld frå 1. september 2002.