Forskrift om fastsetjing og endring av fostringstilskot.

§ 1 . Offentleg fastsetjing av fostringstilskot

Fostringstilskot til barn etter kapittel 7 i barnelova blir fastsett etter reglane i denne forskrifta med vedlegg.

§ 2 . Fordeling av underhaldskostnaden for barnet mellom foreldra etter storleiken på inntekta deira

Fostringstilskotet skal fastsetjast ut frå underhaldskostnaden, jf. § 3 i denne forskrifta, og forholdet mellom foreldra og barnet sine inntekter, jf. § 4 og § 5 i denne forskrifta. Tilskotet til kvart barn skal setjast som anten 1/6, 2/6, 3/6, 4/6 eller 5/6 av underhaldskostnaden. Andelen skal reknast ut frå kor stor del inntekta til den tilskotspliktige utgjer av foreldra si samla inntekt og den delen av barnet si inntekt som skal takast med. Det er den næraste sjettedelen som skal nyttast.

§ 3 . Underhaldskostnaden

Ved offentleg fastsetjing skal det nyttast fastsette underhaldskostnader. Kostnadene omfattar forbruksutgifter, buutgifter og utgifter til barnetilsyn.

Forbruksutgiftene skal setjast i tre aldersgrupper: 0 – 5 år, 6 – 10 år og 11 – 18 år, og skal reknast ut frå Statens institutt for forbruksforsking (SIFO) sitt standardbudsjett for forbruksutgifter. Endringane i forbruksutgiftene skal setjast til 1. juli det året barnet fyller 6 eller 11 år.

Bukostnadene til barnet skal reknast ut frå Statistisk sentralbyrå (SSB) sine forbruksundersøkingar med utgangspunkt i gjennomsnittleg faktisk forbruk. Kostnaden skal vere felles for alle barn og utgjere differansen mellom bukostnadene for einslege utan barn og einslege forsørgjarar og skal gjelde utan omsyn til kor i landet barnet bur.

Utgifter til barnetilsyn skal fastsetjast ut frå om tilskotsmottakaren mottek 66 prosent eller 33 prosent stønad til barnetilsyn etter folketrygdlova § 15-11. Utgifter til barnetilsyn utover fjerde skoleår skal berre takast med når tilskotsmottakaren mottek stønad til tilsynet etter folketrygdlova § 15-11. Det skal setjast ulike beløp for heiltids- og deltidstilsyn. Tilsynsordningar på 33 eller fleire timar per veke skal reknast som heiltidstilsyn. Kostnadene skal reknast utifrå SSB sine foreldrebetalingsundersøkingar medrekna stønad til barnetilsyn og foreldrefrådrag i inntekt. Når tilskotsmottakaren ikkje mottek barnetilsyn etter første punktum, skal det reknast faktiske utgifter opp til ein fastlagd sats redusert for mellom anna fordelen av foreldrefrådrag i inntekt. Ved fastsetjinga av denne satsen gjeld maksimalsatsane for barnetilsyn etter folketrygdlova § 15-11.

Til frådrag i dei samla kostnadene kjem motteken barnetrygd.

For tilskot til barn over 18 år skal underhaldskostnaden for aldersgruppa 11 – 18 år nyttast.

§ 4 . Inntekt

Inntekta for kvar av foreldra skal setjast til personinntekt, medrekna den delen av positive netto kapitalinntekter som overstig kr 10.000,- per år.

Når ein part har inntekt frå sjølvstendig næringsverksemd, skal kapitalinntektsdelen av næringsinntekta reknast med i kapitalinntekta. Kapitalinntektsdelen er næringsinntekt minus utrekna personinntekt, underskot i næring i inntektsåret, framført underskot frå tidlegare år og godtgjering for arbeid til deltakar i deltakarlikna selskap.

Når tilskotsmottakaren mottek kontantstøtte for tilskotsbarnet, utvida barnetrygd eller ekstra småbarnstillegg, skal dette leggjast til i inntekta til tilskotsmottakaren. Det same gjeld den fastsette fordelen av frådrag i skatteklasse 2. Denne skal setjast til 28 prosent av differansen mellom skatteklasse 1 og 2. Skattefordelen skal setjast til halvparten når inntekta til bidragsmottakaren er i grenseområdet for når skatteplikt skal utløysast. Det skal ikkje takast omsyn til toppskatt ved fastsetjinga. Dersom nokre av ytingane i dette stykket er fordelte mellom foreldra som følgje av avtale om delt bustad o.a., skal ytingane leggjast til i kvar av foreldra si inntekt som tilskotsmottakarar slik dei er fordelte.

Inntekta skal fastsetjast etter skjønn når ein part ikkje legg fram etterspurd dokumentasjon, eller dersom det er grunn til å tru at parten held tilbake opplysningar som kan ha noko å seie for avgjerda. Det same gjeld når ein part er utan inntekt, eller inntekta er vesentleg lågare enn det han eller ho burde oppnå ut frå utdanning og evner, utan at parten kan gi ein rimeleg grunn til at han eller ho ikkje har inntekt eller at inntekta ikkje er høgare. Inntekta blir ikkje rekna for å vere vesentleg lågare dersom ein part har ei inntekt som er opp til 20 prosent lågare enn det han eller ho elles burde kunne oppnå.

§ 5 . Inntekta til barnet

Der barnet sjølv har ei årleg inntekt på meir enn 30 gonger fullt tilskotsforskot per månad etter forskotteringslova, skal meirinntekta til barnet reknast inn i den proporsjonale fordelinga av underhaldskostnadene. Når barnet er sjølvforsørgt, skal tilskot ikkje fastsetjast. Eit barn skal reknast for sjølvforsørgt når det har ei årleg inntekt på minst 100 gonger fullt tilskotsforskot per månad.

§ 6 . Tilskotsevne

Utrekna tilskot etter § 2 til § 5 i forskrifta her skal prøvast mot tilskotsevna til den tilskotspliktige. Det vil seie at tilskotet ikkje skal fastsetjast til eit høgare tilskot enn at den tilskotspliktige har att fastsette midla til skatt, eige underhald, buutgifter og underhald av eigne barn i eigen husstand.

Fastsette midla til skatt tek omsyn til skatt på allmenn inntekt før frådrag for gjeldsrenter o.a. og trygdeavgift. Frådraga er minstefrådrag og personfrådrag. Skattebelastninga i tilskotsevnevurderinga skal setjast til 28 prosent og trygdeavgifta til 7,8 prosent.

Midla til eige underhald skal reknast ut frå satsane i gjeldsordningslova for einslege og sambuande/gifte.

Buutgifter for einslege og sambuande/gifte skal reknast ut frå SSB sine forbruksundersøkingar.

Midla til underhald av eigne barn i eigen husstand skal reknast gjennomsnittleg ut frå § 3 i denne forskrifta, men reduserast til det halve. Same sats skal nyttast for alle barn. For eigne barn i eigen husstand som det er avtalt delt bustad for, skal den gjennomsnittleg utrekna underhaldskostnaden reduserast til ein fjerdedel.

Når ein tilskotspliktig med fleire barn ikkje har full tilskotsevne, kan avgjerdsorganet etter eige initiativ fastsetje tilskota til barna som nærare fastsett i barnelova § 58 andre stykke med tilhøyrande forskrift.

§ 7 . Maksimumsgrense for samla tilskotsplikt

Samla tilskot etter § 1 til § 6, § 11 og § 12 i denne forskrifta, medrekna tilskot til barn over 18 år, skal ikkje utgjere meir enn 25 prosent av inntekta til den tilskotspliktige etter § 4.

Når det samla tilskotet til fleire barn overstig maksimumsgrensa, kan avgjerdsorganet etter eige initiativ fastsetje tilskota til barna som nærare fastsett i barnelova § 58 andre stykke med tilhøyrande forskrift.

§ 8 . Delt bustad

Når foreldra er samde om at dei har avtalt delt bustad etter barnelova § 35a for barnet og dokumenterer dette skriftleg, skal det leggjast til grunn at foreldra har dei same utgiftene per dag til barnet den tida barnet bur fast hos kvar av dei og at barnet bur like mykje hos begge. § 1 til § 7 i denne forskrifta skal nyttast tilsvarande.

§ 9 . Samvær

Skriftleg avtalt og offentleg fastsett samvær kjem som hovudregel til frådrag i tilskot utrekna etter § 1 til § 7 i forskrifta her.

For samværsavtalar utan tvangskraft gjeld ikkje regelen i første stykke dersom tilskotsmottakaren hevdar at den tilskotspliktige ikkje følgjer opp avtala og den tilskotspliktige ikkje klart beviser at han kjem inn under samværsklassa. For offentleg fastsett samvær og rettsforlik gjeld ikkje regelen i første stykke dersom tilskotsmottakaren klart beviser at avgjerda ikkje kan leggjast til grunn for frådraget.

Dersom unntaksreglane i andre stykke blir gjort gjeldande, blir det ikkje gitt noko samværsfrådrag med mindre den som får medhald etter andre stykke, skriftleg stadfester at det blir praktisert samvær etter ei lågare samværsklasse.

Samværsfrådraget heng saman med omfanget av samvær slik at dette er delt inn i fire samværsklasser. Frådraget skal gjevast som eit fast kronebeløp avhengig av kva samværsklasse den tilskotspliktige kjem inn under og alderen til barnet. Frådraget er fastsett med utgangspunkt i kostnadene i § 3 andre stykke i denne forskrifta. Kronefrådraget omfattar utgifter til mat, drikke, helse- og hygieneartiklar, leik og fritid og transportutgifter.

Det skal som hovudregel teljast netter for å finne ut kva samværsklasse den tilskotspliktige kjem inn under. Samværsklasse 1 gjeld ved samvær på 2 til 3 netter i gjennomsnitt per månad, klasse 2 ved samvær på 4 til 8 netter, klasse 3 ved samvær på 9 til 13 netter og klasse 4 ved samvær på 14 til 15 netter. Dersom hovudregelen ikkje kan nyttast og den tilskotspliktige minst har to dagar samvær i månaden, skal det teljast dagar, og slik at dagen blir delt inn i fire. Den tilskotspliktige kjem i desse tilfella inn under klasse 1.

§ 10 . Barnetillegg i trygd o.a.

Dersom den tilskotspliktige får pensjon, forsørgjartillegg frå Forsvaret eller anna yting frå det offentlege der barnetillegg er ein del av stønaden, skal tilskotet før samværsfrådrag aldri setjast til ein lågare sum enn netto motteke barnetillegg. Når den tilskotspliktige betaler skatt, skal skattefrådraget setjast til 10 prosent. Når den tilskotspliktige mottek forsørgjartillegg for fleire barn, skal tillegget delast likt mellom barna.

Dersom tilskotsmottakaren mottek slik offentleg yting der barnetillegg er ein del av stønaden, skal tilskotet etter samværsfrådrag aldri setjast høgare enn underhaldskostnaden redusert for tillegget. Første stykke andre og tredje punktum gjeld tilsvarande.

§ 11 . Skjønnsfastsetjing av tilskot

tilskotet skal fastsetjast etter § 59 i barnelova ein av partane er busett eller arbeider og betalar skatt i utlandet og eit kostnadsfastsett tilskot vil verke klart urimeleg fordi tilhøva i vedkommande land er vesentleg ulike norske tilhøve barnet er forsørgt av andre eller gifter seg.

§ 12 . Tilleggstilskot og maksimumsgrense for tilskot

Dersom den tilskotspliktige har ei årleg inntekt som er høgare enn 550 gonger fullt tilskotsforskot per månad etter forskotteringslova, skal det fastsetjast eit tillegg i tilskotet etter krav frå tilskotsmottakaren. Tilleggstilskotet skal setjast til 15 prosent av det utrekna tilskotet før samværsfrådrag. Tillegget blir lagt til for kvar gong inntekta overstig grensa med nye kr 50.000,-.

Det samla tilskotet før samværsfrådrag skal ikkje overstige fem gonger fullt tilskotsforskot per barn per månad.

§ 13 . Endring

Ved fastsetjing av tilskot som tidlegare er fastsett av tilskotsfut, fylkesmann, domstol eller i avtale, skal det gjeldande tilskotet berre endrast dersom reglane i denne forskrifta vil føre til ei endring på meir enn 10 prosent.

§ 14 . Ikraftsetjing

Denne forskrifta tek til å gjelde frå 1. oktober 2003. Frå same tid blir forskrift av 20. mars 1989 nr. 785 om fastsetjing og endring av fostringstilskot oppheva.

Vedlegg. Grunnlagstal for utrekning av fostringstilskot

Grunnlagstal her vert endra kvart år.

Underhaldskostnaden etter § 3 (kroner per månad)

Underhaldskostnaden som skal fordelast mellom foreldra, utgjer kostnader minus barnetrygd.

Forbruksutgifter og buutgifter Alderen til barnet 0 – 5 år 6 – 10 år 11 år og meir Forbruksutgifter 2.280 3.010 3.850 Buutgifter 810 810 810

Utgifter til barnetilsyn når tilskotsmottakaren mottek stønad til barnetilsyn frå folketrygda 66 prosent stønad 33 prosent stønad Heiltidsbarnehage 620 1.170 Deltid, park, SFO 250 470

Frådrag Barnetrygd: 972 Den tilskotspliktige sin del av underhaldskostnaden etter § 2 Den tilskotspliktige sin del av foreldra og barnet sine samla inntekter {Ibp/(Ibp + Ibm + Ibb)} Den tilskotspliktige sin del av underhaldskostnaden 0,000 – 0,249 1/6 0,250 – 0,416 2/6 0,417 – 0,583 3/6 0,584 – 0,750 4/6 0,751 – 1,000 5/6

Tilskotsevne etter § 6 (kroner per månad).

Midla til eige underhald og buutgifter Einslege Gifte/sambuande Midla til eige underhald. 6.245 5.287 Buutgifter 4.313 2.631

Midla til underhald av eigne barn i eigen husstand Barnet har ein bustad Barnet har delt bustad 1.560 780

Skattebelastninga i tilskotsevnevurderinga skal setjast til 28 prosent og trygdeavgifta til 7,8 prosent. Minstefrådraget og personfrådraget skal reknast inn.

Samværsfrådrag etter § 9 (kroner per månad) Alderen til barnet 0 – 5 år 6 – 10 år 11 år og meir Ikkje samvær/samvær mindre enn samværsklasse 1 0 0 0 Samværsklasse 1 (2 – 3 netter eller 2 eller fleire dagar per månad) 150 200 255 Samværsklasse 2 (4 – 8 netter per månad) 495 660 850 Samværsklasse 3 (9 – 13 netter per månad) 690 925 1.185 Samværsklasse 4 (14 – 15 netter per månad) 865 1.160 1.490