Forskrift om endring i forskrift om opptakskrav til grunnutdanningar ved universitet og høgskolar.

I

I forskrift 14. november 2002 nr. 1286 om opptakskrav til grunnutdanningar ved universitet og høgskolar blir det gjort følgjande endringar:

Det skal vurderast individuelt om søkjarar med 3-årig vidaregåande utdanning frå Rudolf Steinerskole oppfyller krava til generell studiekompetanse. Unntak gjeld for søkjarar med fullført og bestått karaktervitnemål frå Oslo By Steinerskole, som skal vurderast på lik linje med søkjarar med fullført og bestått 3-årig vidaregåande opplæring, jf. bokstav a over.

Allmennlærarutdanning med musikk Søkjaren må i tillegg til krava i punkt 6 under dokumentere kunnskapar og dugleik i musikk etter nærare reglar fastsette av institusjonen.

Allmennlærar- og førskolelærarutdanning med sørsamisk ved Høgskolen i Nord-Trøndelag Søkjaren må dokumentere dugleik i sørsamisk språk etter nærare reglar fastsette av institusjonen. For allmennlærarutdanning gjeld i tillegg krava i punkt 6 under.

Allmennlærarutdanning Søkjaren må dokumentere minimum 35 skolepoeng og eit gjennomsnitt på minimum karakteren 3,0 i norsk (14 veketimar) og 3,0 i matematikk (5 veketimar). For søkjarar til allmennlærarutdanning ved Samisk høgskole gjeld i tillegg kravet i § 8 bokstav j punkt 10. For søkjarar som har samisk som førstespråk (hovudmål) eller andrespråk (sidemål) gjeld karakterkravet i norsk for gjennomsnittet av karakterane i norsk og samisk (11+11 veketimar). For søkjarar som har teiknspråk som førstespråk eller finsk som andrespråk, gjeld karakterkravet i norsk gjennomsnittet av karakterane i første- og andrespråk.

Kulturprosjektleiing ved Høgskolen i Lillehammer Søkjaren må dokumentere dugleik i form av innsendt arbeid og bestå opptaksprøve etter nærare reglar fastsette av høgskolen.

For søkjarar med 3-årig vidaregåande utdanning frå Oslo By Steinerskole frå 2004 gjeld framleis at det skal vurderast individuelt om dei fyller krava til generell studiekompetanse, jf. § 2 bokstav d første setning.

§ 11 bokstav f) opphevast.

Ny kommentar til § 2 bokstav d skal lyde:

Til § 2 bokstav d

Oslo By Steinerskole vil frå og med skoleåret 2004–2005 som ei prøveordning skrive ut karaktervitnemål for avgangselevane sine. Dette fører med seg at søkjarar som avsluttar 3-årig vidaregåande utdanning ved Oslo By Steinerskole våren 2005 eller seinare skal ha eit vitnemål med karakterar som skal leggjast til grunn ved søknad om opptak til høgre utdanning. Slike søkjarar skal vurderast på lik line med søkjarar som har fullført og greidd 3-årig vidaregåande opplæring. For søkjarar som avslutta 3-årig vidaregåande utdanning ved Oslo By Steinerskole våren 2004, gjeld framleis at det skal vurderast individuelt om dei fyller krava til generell studiekompetanse.

Kommentaren «Til § 4 Utanlandsk utdanning» fjerde ledd nytt siste punktum skal lyde:

For opptak til allmennlærarutdanning gjeld spesielle poeng- og karakterkrav i norsk og matematikk, jf. kommentarane til § 8 bokstav g punkt 6 fjerde avsnitt.

Kommentaren «Til § 4 Utanlandsk utdanning» femte ledd nytt siste punktum skal lyde:

For opptak til allmennlærarutdanning gjeld spesielle poeng- og karakterkrav i norsk og matematikk, jf. kommentarane til § 8 bokstav g punkt 6 femte avsnitt.

Ny kommentar til § 8 bokstav g punkt 6 skal lyde:

Til § 8 bokstav g punkt 6

Frå og med opptak til studieåret 2005–2006 er det fastsett poeng- og karakterkrav for opptak til allmennlærarutdanning. Søkjarar må dokumentere minimum 35 skolepoeng og eit gjennomsnitt på minimumskarakteren 3,0 i norsk (14 veketimar) og 3,0 i matematikk (5 veketimar). Desse krava gjeld og for opptak til spesialisert allmennlærarutdanning, som til dømes allmennlærarutdanning med realfag og allmennlærarutdanning med musikk etc.

Skolepoeng for opptak til allmennlærarutdanning omfattar karakterpoeng (gjennomsnitt for kvart fag – line, på vitnemålet/kompetansebevis som vert multiplisert med 10), jf. § 3-2 til § 3-4 i forskrift om rangering av søkere ved opptak til grunnutdanninger ved universiteter og høgskoler. I tillegg kjem eventuelle fordjupingspoeng, realfagspoeng og bonuspoeng.

Karakterkravet i norsk omfattar normalt gjennomsnittet av karakterane i hovudmål, sidemål og munnleg. Middelverdien av delkarakterane inngår i utrekninga, jf. § 3-2 sjette ledd i forskrift om rangering av søkere for opptak til grunnutdanningar ved universiteter og høgskoler.

I § 4 i forskrifta går det fram at søkjarar med 3-årig vidaregåande skole frå dei andre nordiske landa er kvalifiserte for opptak utan tilleggskrav i norsk når utdanninga dei har teke, gir generelt opptaksgrunnlag. Det er ein føresetnad at slike søkjarar må oppfylle alternativt karakterkrav i eit anna nordisk språk, jf. artikkel 3 i den nordiske avtalen: «Dersom det stilles krav til særlige kvalifikasjoner eller faglige kunnskaper for å bli tatt opp til en bestemt høyere utdanning, skal utdanningssøkende fra de andre nordiske land oppfylle disse kravene på tilsvarende måte som landets egne søkere.»

Eksamen frå læreplan i norsk som andrespråk med eitt gjennomsnitt på minimum karakteren 3,0. Eksamen frå trinn 3 i norsk for utanlandske studentar ved universiteta med karakteren D eller tilsvarande. Eksamen frå 1-årig høgskolestudium i norsk språk og samfunnskunnskap for utanlandske studentar med karakteren D eller tilsvarande. Test i norsk, høgre nivå, («Bergenstesten») med minimum 500 poeng.

II

Endringane trer i kraft ved opptak til studieåret 2005/2006.