Forskrift om endring i forskrift om budsjett, rekneskap, kontroll og revisjon for friskolar som får statstilskot etter lov om frittståande skolar (økonomiforskrift til friskolelova)

I

I forskrift 19. desember 2006 nr. 1503 om budsjett, rekneskap, kontroll og revisjon for friskolar som får statstilskot etter lov om frittståande skolar (økonomiforskrift til friskolelova) blir det gjort følgjande endringar:

Tittelen på forskriften skal lyde: Forskrift om budsjett, rekneskap, kontroll og revisjon for skolar med rett til statstilskot etter privatskolelova (økonomiforskrift til privatskolelova)

Heimelsfeltet til forskriften skal lyde:

Fastsett av Kunnskapsdepartementet 19. desember 2006 med heimel i lov 4. juli 2003 nr. 84 om private skolar med rett til statstilskot (privatskolelova) § 6-1 femte ledd, § 6A-8 tredje ledd og § 7-1.

§ 1 skal lyde:

Denne forskrifta gjeld skolar som søkjer om godkjenning etter privatskolelova og skolar som driv verksemd etter privatskolelova.

Forskrifta skal vere med på å sikre at grunnlaget for statstilskot til den enkelte skolen er korrekt, og at skolane brukar det offentlege tilskotet og skolepengane i samsvar med privatskolelova og føresetnadene for godkjenninga.

§ 2 første ledd første punktum skal lyde:

Ein søknad om godkjenning etter privatskolelova skal følgjast av eit realistisk budsjett.

§ 2 andre, tredje og fjerde ledd skal lyde:

Dersom skolen skal drive skolefritidsordning, internat, utleige av tenestebustader ved internatet og/eller tilrettelegging i samband med godkjende samarbeidsprosjekt med utanlandske skolar som er knytte til den enkelte skolen, jf. privatskolelova § 2-2 første ledd andre punktum, må ein søknad om godkjenning etter privatskolelova òg følgjast av eit realistisk budsjett for denne drifta. Skolen skal utarbeide eige budsjett for skoleverksemda, skolefritidsordninga, internatet, utleiga av tenestebustader ved internatet og/eller tilrettelegginga i samband med godkjende samarbeidsprosjekt med utanlandske skolar.

Ved søknad om unntak etter privatskolelova § 2-2 første ledd tredje punktum for anna verksemd som er nært knytt til skoleverksemda, gjeld andre ledd tilsvarande.

Ved søknad om driftsendringar etter privatskolelova, skal skolen sende inn nytt budsjett og rekneskap frå det siste året til Utdanningsdirektoratet.

§ 3 og § 4 skal lyde:

Alle skolar som driv verksemd etter privatskolelova, skal føre rekneskap. Rekneskapsføringa skal følgje rekneskapsloven og bokføringsloven. Kontoplanen skal byggje på Norsk Standard 4102 med eigne konti for skolepengar og statstilskot.

Alle transaksjonar som gjeld skoledrifta etter privatskolelova, skal førast i rekneskapen. Rekneskapen skal ikkje innehalde transaksjonar som ikkje vedkjem skoledrifta, jf. privatskolelova § 2-2 første ledd første punktum. Rekneskapen kan likevel innehalde kostnader og inntekter knytte til skolefritidsordning, internat, utleige av tenestebustader ved internatet, tilrettelegging i samband med godkjende samarbeidsprosjekt med utanlandske skolar og anna særskild godkjent verksemd, jf. privatskolelova § 2-2 første ledd andre og tredje punktum. Skoledrifta etter privatskolelova skal førast på eiga avdeling. Ein rekneskap som blir ført med bruk av fleire avdelingar, skal vise interne transaksjonar. Desse transaksjonane skal vere tilfredsstillande dokumentert.

Årsrekneskap, årsmelding, jf. rekneskapsloven § 3-1, og revisjonsmelding skal sendast utan oppmoding til fylkesmannen innan 1. juni året etter rekneskapsåret. Norske skolar i utlandet skal sende dokumentasjon som nemnt i første punktum til Fylkesmannen i Oslo og Akershus. Driv skolen anna verksemd etter privatskolelova § 2-2 første ledd andre og tredje punktum, skal skolen også sende inn avdelingsrekneskap.

For norske skolar i utlandet som har plikt til å føre rekneskap etter lovgivinga i vertslandet, kan Fylkesmannen i Oslo og Akershus etter søknad gi dispensasjon frå tidsfristen i tredje ledd.

Spesifisering av offentlege finansieringskjelder. Spesifiseringa må vise kven som har ytt midlane og formålet med ytinga. Skolepengesatsane. Kva formål investeringsfondet, jf. kapittel 5, skal nyttast til, og korleis grunnlaget for fondsavsetning er rekna ut. Dersom skolen har brukt av fondsmidlane, skal det stå kva midlane er brukte til i note til rekneskapen. Dersom skolen vil bruke fondsmidlane til eit anna investeringsformål knytt til skoledrifta enn det som opphavleg var vedteke, skal dette omtalast i note.

Driv skolen anna verksemd etter privatskolelova § 2-2 første ledd andre og tredje punktum, skal det ved note til årsrekneskapen givast særskilt opplysning om avdelingsvis fordeling av fellesutgifter.

§ 5 første ledd første punktum skal lyde:

Statstilskot og skolepengar frå elevane skal nyttast til å gi opplæring i samsvar med godkjenninga etter privatskolelova.

§ 6 andre ledd første punktum skal lyde:

Dersom det blir teke avgjerd om nedlegging av skoledrifta, skal skolen omgåande og utan oppmoding gi melding til Utdanningsdirektoratet.

§ 6 tredje ledd første punktum skal lyde:

Statstilskot til nye skolar blir ikkje utbetalt før skoleanlegga er godkjende av fylkesmannen, jf. privatskolelova § 2-4, skolen er registrert i Einingsregistret eller i tilsvarande register, jf. privatskolelova § 2-2 andre ledd, og skolen har oppfylt eventuelle andre krav Utdanningsdirektoratet har stilt i vedtaket om godkjenning av skolen.

§ 7 andre punktum skal lyde:

Statstilskot som er overført, må brukast til å dekkje driftsutgifter i det komande rekneskapsåret, og tilskotet må kome elevane til gode, jf. privatskolelova § 6-3 og § 6A-8 første ledd.

§ 11 første ledd tredje punktum skal lyde:

Direktoratet kan også i særskilte tilfelle godkjenne at skolen avviklar fondet og nyttar midlane til skoledrift etter privatskolelova.

§ 11 andre ledd første og andre punktum skal lyde:

Blir investeringsfondet nedlagt fordi skoledrifta blir avskipa, skal dei avsette fondsmidlane inklusiv rente, og aktiva som er finansiert ved slike fondsmidlar, førast attende til Utdanningsdirektoratet, jf. privatskolelova § 7-2 andre ledd. Utdanningsdirektoratet kan i slike tilfelle etter søknad godkjenne at fondsmidlane blir førde over til ei anna skoleverksemd etter privatskolelova.

§ 12 tredje ledd skal lyde:

Utdanningsdirektoratet avgjer i samsvar med privatskolelova § 7-2 første ledd om eit vedtak om skiping av investeringsfond, oppbygging av investeringsfond, bruk av fondsmidlar og nedlegging av investeringsfond er i strid med lov, forskrift eller føresetnadene for godkjenninga.

§ 13 tredje ledd første og andre punktum skal lyde:

Heilårselevar i vidaregåande skolar som er godkjende etter privatskolelova § 2-1, er elevar som minst har eit årstimetal som svarer til det årstimetalet som gjeld for tilsvarande offentlege vidaregåande programområde. Heilårselevar ved vidaregåande skolar godkjende etter privatskolelova § 6A-1, er elevar som følgjer heile årskurs.

§ 15 første ledd fjerde punktum skal lyde:

Det er eit vilkår at elevane har følgt den godkjende opplæringa, jf. privatskolelova § 2-3 og § 6A-2, og at dette kan dokumenterast, jf. § 13.

§ 16 skal lyde:

Revisjonen skal utførast av ein statsautorisert eller registrert revisor i samsvar med revisorloven.

§ 18 skal lyde:

Styret pliktar å gjere revisor kjend med privatskolelova, forskrifter gitt med heimel i lova, føresetnadene for godkjenninga og det årlege tilskotsbrevet frå Utdanningsdirektoratet.

§ 19 første ledd skal lyde:

Styret er ansvarleg for at skolen har tilstrekkeleg dokumentasjon for at privatskolelova, forskrifter gitt med heimel i lova og føresetnadene for godkjenninga er følgde.

II

Endringane trer i kraft frå og med 1. juli 2007.