Forskrift om opptak til Høgskulen i Volda

Del 1. Generelt

§ 1 . Virkeområde

Grunnskulelærarutdanning, bachelorgradar og årsstudium utlyste i Samordna opptak Vidareutdanningar: Studieprogram på lågare grads nivå Studieprogram på høgare grads nivå. Mastergradsutdanningar Praktisk-pedagogisk utdanning for allmennfag og yrkesfag Einskildemne på alle nivå.

§ 2 . Grunnlag for opptak

Til grunnskulelærarutdanning, bachelorgradar og årsstudium som er utlyste i Samordna opptak, gjeld sentral forskrift 31. januar 2007 nr. 173 om opptak til høyere utdanning. Denne forskrifta gjeld også for andre studieprogram på lågare grads nivå i lokale opptak der opptakskravet er generell studiekompetanse. Til studieprogram som byggjer på minimumskrav til høgare utdanning, gjeld forskrifta etter § 2, punkt 1, og fullført minstekravsutdanning i tråd med studieplanen for studieprogrammet. Til mastergrad er det krav om at eitt av følgjande utdanningsløp er fullført: treårig bachelorgrad eller cand.mag.-grad eller annan grad eller yrkesutdanning av minimum tre års omfang eller utdanning som er godkjend som jamgod med ein av gradane eller utdanningsløpa over. I graden eller utdanningsløpet må det inngå fordjuping i fag, emne eller emnegruppe på minst 80 stp. eller integrert yrkesretta utdanning på minst 120 stp. innanfor fagområdet for mastergraden.

Opptak til praktisk-pedagogisk utdanning krev generell studiekompetanse, i tillegg til allmennfagleg eller yrkesfagleg utdanning. Sjå § 16. Opptakskrav til einskildemne er gjeve av nivå på studieprogrammet som emnet er ein del av. Søkjarar som ikkje fyller dei ordinære opptakskrava, kan søkje om opptak på grunnlag av realkompetanse eller be om individuell vurdering av annan kompetanse som likeverdig. Søkjarar med utanlandsk utdanning vert vurderte i tråd med NOKUT si tilråding for det respektive landet (GSU-lista) og eventuell godkjenning av utdanning på høgare nivå. Kravet om norsk (for søkjarar utanom Norden) og engelsk (for søkjarar som ikkje er engelskspråklege) gjeld for opptak til alle studium på alle nivå.

§ 3 . Organisering, regulering og gjennomføring av opptak ved Høgskulen i Volda

Styret vedtek kva studieprogram og kapasitet HVO skal tilby kvart studieår. Poengutrekning, rangering og opptak blir gjennomført av studiedirektøren i samråd med dekanane som er ansvarlege for dei ulike studieprogramma. Den samla strategien for gjennomføring av opptaket vert bestemt i opptaksmøte.

§ 4 . Opptakskomitear

Studiedirektøren kan nemne opp opptakskomite for eit studieprogram eller ei gruppe av studieprogram. Opptakskomiteen skal ha minst ein medlem med fagleg kompetanse i fagområdet for studieprogrammet eller gruppa av studieprogram som den skal vurdere opptak til, og representant(ar) for studentane med inntil 20 prosent av medlemene i komiteen, jf. universitetslova § 4-4, 1. ledd. Opptakskomiteen handsamar saker knytte til realkompetanseopptak. søknader om særskild vurdering. søknader om dispensasjon frå kravet om generell studiekompetanse. Opptakskomiteen kan handsame saker knytte til undervisningsopptak. Studiedirektøren eller den studiedirektøren peiker ut, er sekretær for opptakskomiteen. Det skal førast protokoll frå opptakskomitemøta.

§ 5 . Søknadsfristar

Søknadsfristane i lokale opptak vert bestemte av studiedirektøren i samråd med dekanane. Dersom søkjarsituasjonen eller andre grunnar tilseier andre fristar i dei lokale opptaka, kan studiedirektøren fastsetje andre fristar, m.a. for opptak til vårsemesteret. Søknadsfristane skal kunngjerast samstundes med utlysing av opptaka.

§ 6 . Dokumentasjon og ettersending

Søkjarar til studium i Samordna opptak følgjer fristar og prosedyrar som gjeld for Samordna opptak. I dei lokale opptaka pliktar søkjaren å orientere seg om kva dokumentasjon som er naudsynt for at søknaden skal kunne handsamast. Godkjend dokumentasjon er kopiar av originaldokument. Søkjarar til grunnutdanningar som har eit godkjent elektronisk vitnemål, kan få fritak for kravet om innsending av dokumentasjon til lokalt opptak. For søkjarar som har fullført eit studium ved Høgskulen i Volda for mindre enn 12 månadar sidan, kan Høgskulen bruke tidlegare opptaksvedtak og handsame søknaden utan at søkjaren må sende ny dokumentasjon. Dokumentasjon på utdanning som er under fullføring i opptakssemesteret, skal ettersendast snarast og seinast innan den kunngjorde fristen. Søkjarar i lokale opptak som ikkje følgjer § 6, punkt 2–6, får ikkje handsama søknaden sin og blir følgjeleg ikkje med i opptaket. Studentar må ved førespurnad frå høgskulen framvise originaldokument som er grunnlaget for opptak til studium eller for utskriving av vitnemål ved Høgskulen i Volda. Studentar som ikkje framviser dei førespurde originaldokumenta for kontroll, kan misse studieretten. Vitnemål frå Høgskulen i Volda vil kunne bli holdt tilbake til dei førespurde originaldokumenta er framviste og kontrollerte.

§ 7 . Poengutrekning og rangering

Til grunnutdanning gjeld poengutrekning og rangering innanfor kvotar fastsette i forskrift 31. januar 2007 nr. 173 om opptak til høyere utdanning. Til studieprogram som byggjer på minimumskrav til høgare utdanning, gjeld § 7, punkt 1. I tillegg må minstekravsutdanninga som er fastsett i studieplanen, vere fullført og bestått. Til mastergradsutdanning blir søkjarane poengutrekna og rangerte på grunnlag av vekta gjennomsnittskarakter frå grunnutdanninga.

Gammal type bokstavkarakterar: Sg = 5; Mg = 4; G = 3; Ng = 2 Talkarakterar: 1,0–2,0 = 5; 2,1–2,5 = 4; 2,6–2,9 = 3; 3,0–3,4 = 2; 3,5–4,0 = 1 Bokstavkarakterar: A = 5; B = 4; C = 3; D = 2; E = 1 Stått/bestått/godkjent = 3.

Dersom fleire søkjarar har lik poengsum, skal rangeringa avgjerast ved loddtrekking.

§ 8 . Utsett studiestart

Studiedirektøren kan etter søknad gje ein søkjar utsett studiestart dersom vedkomande har stadfesta at han tek imot tilbodet om studieplass og har gode grunnar for å søkje om utsetjing. Grunnar for å få innvilga søknad om utsett studiestart er normalt at studenten er innkalla til førstegongs militær- eller sivilteneste, er alvorleg sjuk eller er gravid. Andre tungtvegande grunnar kan også gje grunnlag for å imøtekome søknaden. Grunnane skal dokumenterast (innkallingsbrev, legeattest m.m.). Dei som får innvilga søknaden om utsett studiestart, får reservert studieplassen til neste gong studieprogrammet har ordinær studiestart. Det vert normalt berre innvilga utsett studiestart for eitt år. Dei som har fått utsett studiestart, må stadfeste bruk av den reserverte studieplassen ved å søkje om opptak på nytt innan søknadsfristen for neste opptak til studieprogrammet. Prosedyrane skal gå fram av innvilgingsbrevet. Søknadsfristen er tre veker etter at ein har motteke tilbodet. Ein kan ikkje reservere studieplassar tildelt i Samordna opptak med «betinga opptak» som opptaksgrunnlag.

§ 9 . Grunngjeving og klage

Grunngjeving og klage skal rettast til studiedirektøren som ansvarleg for gjennomføring av opptaket. Studiedirektøren skal etterprøve saka for eventuelle sakshandsamingsfeil og rette opp dersom gjeldande vedtak er feil. Dersom studiedirektøren held oppe vedtaket, kan søkjaren klage til klagenemnda. Vedtaks- og klagesaker er regulerte av forvaltningslova, kap. 5 og 6.

Del 2. Særskilde opptakskrav

§ 10 . Opptak på grunnlag av realkompetanse

Ein søkjar som ikkje kan dokumentere generell studiekompetanse eller spesielle opptakskrav, kan få opptak på grunnlag av fagleg realkompetansevurdering i opptakskomite. Ved søknad til grunnutdanning må søkjaren vere 25 år eller eldre i opptaksåret. Ved søknad til mastergradsutdanning må søkjaren vere 28 år eller eldre i opptaksåret. Søkjaren må ha minimum eitt år relevant høgre utdanning på lågare grads nivå dersom ein søkjer studium på høgare grads nivå. Søkjarar med morsmål frå land utanfor Norden må dokumentere kunnskap i norsk på nivå med kravet som inngår i generell studiekompetanse. Søkjaren må ha til saman fem års yrkespraksis og/eller utdanning. Utdanning, organisasjonsarbeid eller liknande kan utgjere inntil to av desse fem åra. Minst tre år må vere relevant praksis i høve til utdanninga det vert søkt opptak til. For å få tilbod om opptak krev ein likeverdig dugleik og kunnskap med søkjarar som får tilbod etter rangering på grunnlag av poengutrekning. Realkompetansesøkjarar skal rangerast i høve til poengutrekna søkjarar ved hjelp av skjønsmessig vurdering. Studiedirektøren fastset retningsliner for realkompetansevurdering.

§ 11 . Opptakskrav til mastergradsstudiet i nynorsk skriftkultur

Opptaksgrunnlaget til mastergradsstudiet i nynorsk skriftkultur er oppnådd bachelorgrad eller cand.mag.-grad med fordjuping/mellomfagseksamen tilsvarande 90 studiepoeng i eitt av følgjande fag eller tilgrensande fagområde: etnologi, filosofi, historie, idehistorie, kulturvern og kulturformidling, lingvistikk, litteraturvitskap, medievitskap, norsk/nordisk, pedagogikk, sosialantropologi, sosiologi eller statsvitskap. Søkjarar som har andre relevante fag eller utdanning på same nivå og av tilsvarande omfang, kan søkje om særskild vurdering.

§ 12 . Opptakskrav til mastergradsstudiet i samfunnsplanlegging og leiing

Opptaksgrunnlaget for mastergradsstudiet i samfunnsplanlegging og leiing er eitt av følgjande: minst tre år høgare utdanning med minst 80 studiepoeng i samfunnsfag/samfunnsplanlegging og leiing. minst tre år anna høgare utdanning og minst to år relevant praksis frå samfunnsplanlegging og leiing. Alle studentar på mastergradsstudiet må søkje undervisningsopptak til dei avsluttande emna «Forskingsmetode og vitskapsteori» og «Masteroppgåve». Alle obligatoriske emne må vere fullførte med karakteren C eller betre for å få opptak til dei avsluttande emna. Ved rangering tek ein utgangspunkt i karakterane på dei obligatoriske emna. Deretter blir søkjarane rangerte på grunnlag av gjennomsnittskarakterar på alle emna søkjarane har gjennomført i mastergradsstudiet sitt. Ved lik rangering vert opptak avgjort ved loddtrekking. Alle masteremna til Institutt for planlegging, administrasjon og skuleretta samfunnsfag som inngår i masterprogrammet Samfunnsplanlegging og leiing, med unntak av «Forskingsmetode og vitskapsteori» og «Masteroppgåve», kan takast som frittståande vidareutdanningar, og då er opptakskravet tre år høgare utdanning, 180 stp.

§ 13 . Opptakskrav til mastergradsstudiet i undervisning og læring med spesialiseringar i matematikk, norsk eller spesialpedagogikk

Opptaksgrunnlaget til mastergradsstudiet i undervisning og læring er fullført grunnutdanning ved universitet eller høgskule av minimum tre års omfang (180 stp.) innanfor følgjande utdanningsvegar: bestått minimum dei tre første åra i grunnskulelærarutdanninga. allmennlærarutdanning. førskulelærarutdanning/barnehagelærarutdanning. faglærar med praktisk-pedagogisk utdanning. Til spesialiseringa i matematikk er det eit tilleggskrav at søkjaren må ha minst 60 studiepoeng i faget matematikk. Til spesialiseringa i norsk er det eit tilleggskrav at søkjaren må ha minst 60 studiepoeng i faget norsk.

Søkjarar med fullført utdanning som barnevernspedagog, vernepleiar eller anna treårig relevant profesjonsutdanning kan takast opp etter særskild vurdering. Inntil 30 prosent av studieplassane er reserverte for grunnskulelærarstudentar ved Høgskulen i Volda som vel overgang til Masterstudiet i undervisning og læring det fjerde året i utdanninga si. Dersom grunnskulelærarstudentane utgjer meir enn 30 prosent, blir dei rangerte og tildelt studieplass på same måten som ordinære søkjarar. Det vert gjeve tilleggspoeng slik: eitt poeng pr. år inntil fem år for pedagogisk praksis frå barnehage, skule eller annan pedagogisk institusjon etter avslutta grunnutdanning. eitt poeng pr. 30 studiepoeng og inntil 3 poeng (90 studiepoeng) når søkjaren dokumenterer høgare utdanning ut over opptaksgrunnlaget. Ein krev minst karakteren C (2, 8, G eller stått) i fordjupingsfaget (matematikk eller norsk) som det blir søkt opptak på grunnlag av. Alle studentar på mastergradsstudiet må søkje om undervisningsopptak til dei avsluttande emna «Vitskapsteori, forskingsmetode og statistikk» og «Masteroppgåve». Desse emna har avgrensa tal på studieplassar. Søkjarane må ha C eller betre i snitt frå dei fire første obligatoriske emna, og blir deretter rangerte på grunnlag av gjennomsnittskarakterane frå desse emna. Ved lik rangering vert opptak avgjort ved loddtrekking.

§ 14 . Opptakskrav til mastergradsstudiet i kulturmøte

Opptaksgrunnlaget til mastergraden i kulturmøte er fullført grunnutdanning ved universitet eller høgskule med minimum tre års omfang (180 stp.) innanfor følgjande utdanningsvegar: bachelorgrad eller tilsvarande (minimum 180 stp.) med fordjuping i historie eller religion med minimum 80 studiepoeng. allmennlærarutdanning/grunnskulelærarutdanning med fagval i historie/RLE/samfunnsfag og minimum 20 studiepoeng fordjuping (200-nivå) i det same faget. tilsvarande kompetanse innanfor humaniora eller samfunnsvitskap etter særskild vurdering. Ein krev minst karakteren C (G, 2, 8 eller stått) i fordjupingsfaget (historie, religionsvitskap eller anna) som det blir søkt opptak på grunnlag av.

§ 15 . Opptakskrav til mastergradsstudiet i helse- og sosialfag

Opptaksgrunnlaget til mastergraden i helse- og sosialfag er fullført minimum treårig helsefagleg, pedagogisk eller sosialfagleg grunnutdanning: Bachelorgrad i helse- eller sosialfag. Lærar- eller kulturfagleg utdanning med relevante fagval. Cand.mag.-grad med relevant fagsamansetjing. Annan relevant grad eller utdanningsløp av minimum tre års omfang etter særskild vurdering.

Søkjarane konkurrerer i ein av to kvotar: ein kvote for dei som har helsefagleg grunnutdanning, og ein kvote for dei som har sosialfagleg eller pedagogisk grunnutdanning. Søkjarane vert rangerte etter poengsum innanfor kvar av kvotane. Kvar av kvotane skal som hovudregel utgjere minimum 30 prosent av studieplassane. Alle studentar på mastergradsstudiet må søkje undervisningsopptak til dei avsluttande emna «Forskingsmetode og vitskapsteori» og «Masteroppgåve». Alle obligatoriske emne må vere fullførte med karakteren C eller betre for å få opptak til dei avsluttande emna. Ved rangering tek ein utgangspunkt i karakterane på dei obligatoriske emna. Deretter blir søkjarane rangerte på grunnlag av gjennomsnittskarakterar på alle emna søkjarane har gjennomført i mastergradsstudiet sitt. Ved lik rangering vert opptak avgjort ved loddtrekking.

§ 15A . Opptak til mastergradsstudiet i dokumentar og journalistikk

Opptaksgrunnlaget til mastergradsstudiet i dokumentar og journalistikk er eitt av følgjande: fullført utdanning ved universitet eller høgskule med minimum tre års omfang (180 stp.) som inneheld 80 stp. i journalistikk eller dokumentarfilmstudium. fullført treårig (180 stp.) anna høgare utdanning og to år relevant yrkespraksis som journalist eller frå dokumentarfilmproduksjon. Annan utdanningsbakgrunn vert vurdert særskild.

§ 16 . Opptakskrav til praktisk-pedagogisk utdanning

Allmennfag Studentar med allmennfagleg kompetanse vert tekne opp på grunnlag av fullført allmennfagleg universitets- eller høgskuleutdanning av minimum tre års omfang, dvs. minimum 180 studiepoeng. Allmennfagleg kompetanse er i denne samanhengen utdanning som kvalifiserer for undervisning i allmennfag i grunnskulen, i vidaregåande opplæring eller i vaksenopplæringa. Ved opptak til allmennfagleg variant prioriterer vi slik (undervisningsfaga må vere fag som høgskulen tilbyr fagdidaktikk i): Søkjarar med fullført masterstudium/hovudfag og med minst eitt relevant undervisningsfag. Søkjarar med bachelor-/cand.mag.-grad eller tre års utdanning og med to relevante undervisningsfag, der minimum 150 studiepoeng er samla i desse to faga med minimum 90 studiepoeng samla i det eine faget, av dei minimum 30 stp. som fordjuping. Søkjarar med bachelor-/cand.mag.-grad eller med tre års utdanning med eitt relevant undervisningsfag med minimum 90 studiepoeng samla i dette faget, av dei minimum 30 stp. som fordjuping. Søkjarar med tre års utdanning og med tre relevante undervisningsfag, med minimum 180 studiepoeng samla i desse tre faga (t.d. tre årsstudium). Søkjarar med tre års utdanning og med to relevante undervisningsfag, med minimum 120 studiepoeng samla i desse to faga (t.d. to årsstudium). Inntil 20 prosent av studieplassane på den allmennfaglege varianten vert reserverte for studentar som fullfører eit bachelorstudium ved HVO. Desse skal rangerast på grunnlag av vekta gjennomsnittskarakter frå bachelorstudiet. Søkjarar med tilsetting på vilkår kan bli prioriterte ved opptak. Yrkesfag Studentar med yrkesfagleg kompetanse blir tekne opp på eitt av følgjande to grunnlag: Fullført treårig profesjonsretta universitets- eller høgskuleutdanning og minimum to års relevant yrkespraksis. Profesjonsretta utdanning er i denne samanhengen utdanning som kvalifiserer for undervisning på yrkesfaglege studieretningar i vidaregåande opplæring, t.d. fagskule/høgare utdanning. Generell studiekompetanse og fag-/sveinebrev eller anna fullført treårig yrkesutdanning på vidaregåande nivå, to års relevant yrkesteoretisk utdanning og minimum fire års yrkespraksis. To år av læretida kan inngå i praksiskravet. Lengre yrkespraksis og god yrkesteoretisk utdanning kan etter individuell vurdering kompensere for kravet om generell studiekompetanse. Ved opptak til den yrkesfaglege varianten prioriterer vi slik: Søkjarar med fullført masterstudium/hovudfag, og med relevant undervisningsfag for vidaregåande skule. Søkjarar med bachelor-/cand.mag.-grad, og med relevant undervisningsfag for vidaregåande skule. Søkjarar som tilfredsstiller krava til generell studiekompetanse og fag-/sveinebrev eller anna fullført treårig yrkesutdanning på vidaregåande nivå, yrkesteoretisk utdanning og minimum to års yrkespraksis. Studentane i denne gruppa vert prioriterte etter utdanning og yrkespraksis. Søkjarar med tilsetting på vilkår kan bli prioriterte ved opptak. Søkjarar som ikkje kjem inn under kriteria for allmennfag eller yrkesfag, kan søkje om opptak etter særskild vurdering eller på grunnlag av realkompetanse. Ved opptak til praktisk-pedagogisk utdanning er det krav om å levere politiattest, jf. sentral forskrift 31. januar 2007 nr. 173, Opptak til høyere utdanning, kap. 6.

§ 17 . Verknadstidspunkt og oppheving av forskrift

Forskrifta har verknad frå 30. januar 2014. Forskrift 6. desember 2012 nr. 1321 om opptak til Høgskulen i Volda vert oppheva frå same dato.