Forskrift om opptak til Høgskulen på Vestlandet

Kapittel 1. Verkeområde og definisjonar

§ 1-1 . Verkeområde

(1) Forskrifta gjeld opptak til alle utdanningar ved Høgskulen på Vestlandet til og med masternivå. Opptak til doktorgradsprogram er regulert i forskrift for graden philosophiae doctor (ph.d.) ved Høgskulen på Vestlandet.

(2) Det kan gjelde eigne reglar for fellesgradar som vert tilbydde i samarbeid med ein eller fleire lærestader.

(3) Lov 1. april 2005 nr. 15 om universiteter og høyskoler (universitets- og høyskoleloven), forskrift 31. januar 2007 nr. 173 om opptak til høyere utdanning (opptaksforskriften), forskrift 1. desember 2005 nr. 1392 om krav til mastergrad (mastergradsforskriften), lov 10. februar 1967 om behandlingsmåten i forvaltningssaker (forvaltningsloven), og dessutan forskrifter om rammeplanar og andre nasjonale avgjersler, er overordna denne forskrifta og gjeld føre forskrifta ved eventuell motstrid.

§ 1-2 . Definisjonar

(1) Opptak inneber at ein person har søkt, fått vurdert kompetansen sin og fått studierett til eit studieprogram, studium eller emne tilknytt ein av studiestadane ved Høgskulen på Vestlandet.

(2) Lokalt opptak viser til opptak som ikkje høyrer til det nasjonale samordna opptaket.

(3) Opptakskrav er dei krava som vert stilte til ein søkjar, for å bli vurdert som kvalifisert for opptak. Opptakskrav skal gå fram av studieplanar eller emnebeskriving for alle studium og emne som har eige opptak.

(4) Med grunnutdanning og integrert mastergradsutdanning meiner ein eit studieprogram der opptak normalt ikkje byggjer på anna grunnlag enn fullført utdanning frå vidaregåande skule, eller godkjent realkompetanse.

(5) Med mastergradsutdanning meiner ein eit studieprogram som byggjer på utdanning på bachelorgradsnivå og som fører fram til ein mastergrad.

(6) Med vidareutdanning meiner ein studiepoenggjevande ny formell kompetanse på universitets- og høgskulenivå som til vanleg bygger på fullført grunnutdanning.

(7) Med praktisk-pedagogisk utdanning meiner ein pedagogisk tilleggskompetanse til høgare utdanning eller yrkesfagleg utdanning.

(8) Med enkeltemne meiner ein emne som er opne for søkjarar som ikkje har studierett på studieprogrammet som emnet høyrer til, eller emne som vert tilbydde som frittståande studium.

(9) Med overflytting og innpass meiner ein direkte opptak til 2. år eller seinare i eit utdanningsløp, der søkjarane får innpassa fag som dei alt har greidd («bestått») i den graden dei får opptak til.

(10) Med oppdragsfinansierte studium i denne forskrifta meiner ein studium som blir gjennomførte mot vederlag, betalte av ein eller fleire oppdragsgjevarar, og der studiet ikkje er retta mot enkeltstudentar, men mot oppdragsgjevaren si målgruppe.

(11) Med betalingsstudium meiner ein kurs, emne og studieprogram der Høgskulen krev eigenbetaling frå studentar, jf. forskrift 15. desember 2005 nr. 1506 om egenbetaling ved universiteter og høyskoler § 3-2.

Kapittel 2. Minstekrav for opptak

§ 2-1 . Generelle føresegner

(1) Minstekrav for opptak til utdanning som gjev studiepoeng ved Høgskulen på Vestlandet er generell studiekompetanse eller tilsvarande realkompetanse, slik dette er fastsett i forskrift om opptak til høyere utdanning.

(2) Søkjarar som har utanlandsk utdanning frå land utanfor Norden, må dokumentere at dei oppfyller krav til norsk- og engelskkunnskapar slik dette er fastsett i forskrift om opptak til høyere utdanning for å kvalifisere for opptak til studium som gjev studiepoeng.

(3) Krav om norskkunnskapar gjeld ikkje dersom både obligatoriske delar av studiet og den aktuelle spesialiseringa, vert undervist på engelsk.

Engelsk frå Vg1 i norsk vidaregåande skule (140 årstimar) med karakteren 4 eller betre. International English Language Testing Service (IELTS) med minst 6.0 poeng. Test of English as a Foreign Language (TOEFL) med minst 550 poeng for Paper-based test (PBT), minst 213 poeng for Computer-based test (CBT), eller minst 80 poeng for Internet-based test (IBT). Annan dokumentasjon kan godkjennast etter individuell vurdering. Unnatak frå kravet for enkeltstudium kan fastsetjast av styret i den aktuelle studieplanen.

(5) Styret kan fastsetje spesielle opptakskrav til studium som ikkje vert omfatta av forskrift om opptak til høyere utdanning i studieplan, jf. universitets- og høyskoleloven § 3-6 sjuande ledd og § 3-7.

§ 2-2 . Opptaksgrunnlag grunnutdanningar

Opptakskrav til årsstudium, bachelor og integrert masterutdanning er generell studiekompetanse eller realkompetanse, eventuelt i kombinasjon med spesifikke fag- eller karakterkrav, slik dei er fastsette i forskrift om opptak til høyere utdanning.

§ 2-3 . Opptaksgrunnlag mastergradsutdanning

For opptak til mastergrad gjeld forskrift om krav til mastergrad § 3, § 4 og § 5 og eventuelle rammeplanar.

Nærare krav til fagleg grunnlag og faglege minstekrav for den enkelte utdanninga vert fastsett av styret i studieplanen, jf. § 2 i mastergradsforskriften.

§ 2-4 . Opptaksgrunnlag vidareutdanning

For opptak til vidareutdanningar utan rammeplan, gjeld dei opptakskrava som er fastsette i studieplanen.

For opptak til vidareutdanningar med rammeplan, gjeld dei opptakskrava som er fastsette i rammeplanen og eventuelle tilleggskrav, fastsette av styret i studieplanen.

§ 2-5 . Opptaksgrunnlag praktisk-pedagogisk utdanning

For opptak til praktisk-pedagogisk utdanning gjeld minstekrav som er fastsette i rammeplanen og opptakskrav slik dei går fram av studieplanen.

§ 2-6 . Opptaksgrunnlag enkeltemne

For opptak til enkeltemne må søkjaren dekkje opptakskrava til den utdanninga som emna ein søkjer opptak til, inngår i. Eventuelle krav om fagleg forkunnskap for emnet må òg dekkjast, jf. Forskrift om studium og eksamen ved Høgskulen på Vestlandet § 4-5.

§ 2-7 . Opptaksgrunnlag overflyttingsopptak

Minstekrav for å kunne reknast som kvalifisert for direkte opptak til 2. år eller seinare i eit utdanningsløp, er at opptakskravet til utdanninga er dekt, og dessutan at søkjaren har tilsvarande fagleg progresjon som det kullet det vert søkt om opptak til.

§ 2-8 . Opptaksgrunnlag betalingsstudium/oppdragsstudium

Alle oppdragsstudium og betalingsstudium som gir utteljing i studiepoeng, høyrer til ein av kategoriane i § 2-2 til § 2-8 i denne forskrifta og har tilsvarande opptakskrav og rangeringsreglar.

§ 2-9 . Opptaksgrunnlag andre studium

(1) For opptak til forkurs og realfagskurs gjeld nasjonal plan for eittårig forkurs for 3-årig ingeniørutdanning og integrert masterstudium i teknologiske fag og tilhøyrande halvårleg realfagskurs, fastsett av Universitets- og høgskolerådet i Nasjonale retningslinjer for ingeniørutdanning.

(2) For studium som ikkje har nasjonale rammeplanar eller føringar, så gjeld opptakskrav og fagleg grunnlag slik dei går fram av studieplanen og i retningslinjer om opptak og rangering, fastsette av styret ved Høgskulen på Vestlandet.

Kapittel 3. Realkompetanse

§ 3-1 . Realkompetanse

(1) Høgskulen kan gi søkjarar som er 25 år eller eldre i opptaksåret, og som manglar generell studiekompetanse, opptak på grunnlag av realkompetanse, jf. universitets- og høgskulelova § 3-6 (2) og forskrift om opptak til høyere utdanning § 3-1.

(2) For å få tilbod om studieplass må søkjaren dokumentere likeverdige ferdigheiter og kunnskapar som søkjarar som får tilbod om plass etter ordinære rangeringsreglar, jf. kapittel 5 i denne forskrifta.

(3) Nærmare reglar om opptak på grunnlag av realkompetanse er nedfelte i retningslinjer for opptak og rangering.

Kapittel 4. Kvotar og opptaksrammer

§ 4-1 . Kvotar og opptaksrammer

(1) Styret sjølv fastset årleg tal studieplassar for dei enkelte studieprogramma, jf. § 3-7 femte ledd i lov om universiteter og høyskoler.

(2) Styret, eller det organet styret nemner opp, gjennomfører opptak av studentar.

(3) Opptak til studia skjer på grunnlag av rangering innanfor kvotar. Kvote er eit bestemt tal eller ein bestemt del av studieplassane som blir fordelt blant søkjarar som tilfredsstiller nærmare bestemte krav.

(4) Styret kan i studieplanen fastsetje kvotar for søkjarar med ulike søkjargrunnlag.

Kapittel 5. Rangering

§ 5-1 . Poengutrekning og rangering av søkjarar til grunnutdanningar

(1) Ved opptak til grunnutdanningar blir søkjarar poengutrekna og rangerte etter føresegner, gjett i kapittel 7 i forskrift om opptak til høyere utdanning.

(2) Realkompetansesøkjarar vert rangerte i forhold til andre søkjarar på grunnlag av ei heilskapleg skjønnsmessig vurdering. Omfanget og relevansen av praksis, utdanning og motivasjon blir vektlagd.

§ 5-2 . Generelle føresegner om rangering av søkjarar til studium i lokale opptak

(1) Styret fastset rangeringsreglane for det einskilde studiet innanfor ramma av gyldige poenggrunnlag i eigne retningslinjer om opptak og rangering.

(2) Grunnlaget for rangeringa er den dokumentasjonen som kvalifiserer søkjaren for eit studium, jf. kapittel 2 i denne forskrifta. Søkjarane vert rangerte innbyrdes i kvotar på grunnlag av konkurransepoeng.

Ved elles lik poengsum i ein kvote skal eldre søkjarar rangerast framfor yngre. Styret kan fastsetje i studieplanen at det kjønnet som er underrepresentert i ein kvote skal prioriterast først.

(4) Dersom ein søkjar har fleire opptaksgrunnlag, blir det grunnlaget som gir gunstigast resultat for søkjaren, valt.

(5) Dersom det har vist seg umogeleg å fylle studieplassane på eit studium, så kan ledige studieplassar tilbydast kvalifiserte søkjarar utan omsyn til rangeringa elles. Søknader som er mottekne etter fristen, skal rangerast etter søknadsdato.

§ 5-3 . Poengutrekning og rangering av søkjarar til mastergrad og vidareutdanningar på høgare grads nivå

Karakterpoeng: Det vert rekna ut eit vekta karaktergjennomsnitt av opptaksgrunnlaget. Styret kan fastsetje i studieplanen at berre delar av opptaksgrunnlaget skal inngå i karakterpoengsummen. Utdanningspoeng: Det kan bli gitt utdanningspoeng for greidd høgare utdanning ut over minstekravet for opptak. Praksispoeng: Det kan bli gitt poeng for relevant arbeidserfaring. Praksis som søkjaren har skaffa seg før kvalifiserande utdanning er fullført, og praksis som inngår i kvalifiseringsgrunnlaget, vert ikkje medrekna i grunnlaget for praksispoeng. Andre tilleggspoeng: Med utgangspunkt i særlege omsyn som er knytte til enkelte studium, kan styret fastsetje andre poengtypar i studieplanen.

(2) For søkjarar med bokstavkarakterar vert følgjande følgjande omrekningsskala nytta som grunnlag for utrekning av gjennomsnittskarakter: A=5, B=4, C=3, D=2, E=1. Nærare føresegn om omrekning av karakterar frå andre karakterskalaer er gitt i retningslinjer om opptak og rangering.

(3) I særskilde tilfelle kan anna utdanning enn den som inngår i det formelle opptaksgrunnlaget, bli teken med i rangeringa. Søknaden vert då rangert etter § 5-5 i denne forskrifta.

§ 5-4 . Rangering av søkjarar til andre studium

(1) Ved opptak til studium som har generell studiekompetanse som opptakskrav, blir søkjarane rangerte etter føresegnene gitt i forskrift om opptak til høyere utdanning. Utfyllande føresegn blir fastsett av styret i retningslinjer om opptak og rangering.

(2) Reglar for rangering av søkjarar til y-veg, overflyttingsopptak, enkeltemneopptak, forkurs og dykkarutdanning blir fastsette av styret i retningslinjer om opptak og rangering.

(3) For oppdragsstudium gjeld ikkje § 5-1 til § 5-3 i denne forskrifta. Oppdragsgjevarar rangerer sjølve sine søkjarar etter at høgskulen har godkjent opptaksgrunnlaget deira.

(4) Ved opptak til studium definert i § 1-2 ellevte ledd som har generell studiekompetanse som einaste opptakskrav blir søkjarane rangert etter søknadsdato, med mindre anna er fastsett i emne-/studieplan.

§ 5-5 . Rangering av søkjarar som ikkje kan poengutreknast

(1) Kvalifiserte søkjarar som ikkje kan poengutreknast etter § 5-1 til § 5-4 i denne forskrifta, skal rangerast etter ei heilskapleg og skjønnsmessig vurdering av søkjaren sitt opptaksgrunnlag.

(2) For å få tilbod om opptak blir det kravd likeverdige ferdigheiter og kunnskapar med søkjarar som får tilbod om opptak etter rangering på grunnlag av poengutrekning.

Kapittel 6. Særskilt vurdering

§ 6-1 . Særskilt vurdering

(1) Det kan gjerast unnatak frå delar av rangeringsføresegnene i kapittel 5, dersom det ligg føre grunnar for særskilt vurdering. Grunnlag for opptak etter særskilt vurdering kan vere at anna morsmål enn norsk, sjukdom, funksjonshemming eller andre spesielle forhold gir grunn til å anta at søkjaren sin karakterpoengsum ikkje gir eit riktig bilete av søkjaren sine kvalifikasjonar.

(2) Søkjarar som ønskjer å bli vurderte etter denne føresegna, må be om dette i søknaden og leggje ved eiga grunngjeving og dokumentasjon av dei forholda som skal ligge til grunn for særskilt vurdering.

(3) Forholda nemnd i første ledd gir i seg sjølv ikkje rett til studieplass. For å få tilbod om opptak er det krav om likeverdige ferdigheiter og kunnskapar med søkjarar som får tilbod om opptak etter kapittel 5.

(4) Søkjarar som ikkje får tilbod om opptak etter desse reglane, skal rangerast etter føresegnene i § 5.

Kapittel 7. Opptak og tilbod på visse vilkår (Betinga opptak)

§ 7-1 . Opptak på visse vilkår (betinga opptak)

(1) Med opptak på visse vilkår (betinga opptak) meiner ein opptak av søkjarar som grunna særskilde forhold ikkje tilfredsstiller heile opptakskravet til eit studium, men som kjem til å dekke opptakskravet etter studiestart, normalt i løpet av første semester av studieløpet.

(2) Betinga opptak kan berre bli gitt dersom søkjaren ved studiestart ikkje manglar meir enn 15 studiepoeng for å dekke opptaksgrunnlaget, jf. kapittel 2. Eventuelle krav til fordjuping må vere dekte. Vidare må eventuelle forkunnskapskrav til eit emne vere greidde før søkjarar med betinga opptak kan få tilgang til emnet.

(3) Med særskilde forhold er det her meint sjukdom, ulukker eller dødsfall i nær familie. Andre særskilde forhold kan også gi grunnlag for betinga opptak. Særskilde forhold må dokumenterast ved attest frå lege, anna helsepersonell, politi eller tilsvarande.

§ 7-2 . Tilbod på visse vilkår (betinga tilbod)

Høgskulen kan i særskilde tilfelle gi betinga tilbod om studieplass til søkjarar som ikkje tilfredsstiller heile opptakskravet på det tidspunktet dei får tilbod om studieplass, men som har dokumentert at dei vil dekkje kravet før studiestart.

§ 7-3 . Generelle føresegner om tilbod og opptak på visse vilkår

(1) Søkjarar som har fått opptak eller tilbod etter føresetnadane gitt i § 7-1 eller § 7-2 og som ikkje innfrir vilkåra for opptak innan den gitte fristen, misser tilbodet om studieplass.

(2) Det kan ikkje bli gitt betinga opptak eller tilbod til søkjarar som ikkje kan dokumentere tilstrekkelege kunnskapar i norsk og engelsk, jf. § 2-1.

Kapittel 8. Felles føresegner om administrative forhold

§ 8-1 . Reservert studieplass

Tildelt studieplass kan reserverast til neste gong det er opptak til studiet dersom det ligg føre dokumenterte, tungtvegande grunnar. Det vert normalt ikkje innvilga reservert plass for meir enn eitt år.

Søknad om reservering av studieplass må leggast fram innan tre veker etter at ein har motteke tilbod om studieplass.

§ 8-2 . Førehandsløfte

Det kan bli gitt førehandsløfte til kvalifiserte søkjarar som med god margin ville ha kome inn ved siste opptak.

§ 8-3 . Fristar

(1) Søknadsfristar for opptak til Høgskulen sine studium blir kunngjorde samstundes med utlysinga av studieprogrammet.

(2) All dokumentasjon som skal liggje til grunn for opptak, må følgje søknaden. Vitnemål/karakterutskrifter for utdanning og praksis som blir avslutta i det semesteret opptaket skjer, må ettersendast innan den fristen som er gitt av Høgskulen.

§ 8-4 . Verifisering av dokumentasjon

Høgskulen kan krevje at søkjarane legg fram original av dokument som skal liggje til grunn for opptak for å vurdere at desse er ekte, jf. universitets- og høyskoleloven § 3-7 sjette ledd.

§ 8-5 . Trekk av studium

Styret kan gjere vedtak om avlysing av opptak til ei utdanning dersom det ikkje er nok kvalifiserte søkjarar.

§ 8-6 . Klage

(1) Enkeltvedtak som er gjorde med heimel i denne forskrifta, kan klagast på, jf. forvaltningsloven § 28 til § 32. Klagefristen er 3 veker frå den dagen resultatet av opptaket er offentleggjort, eventuelt 3 veker frå mottatt grunngjeving.

(2) Klage på enkeltvedtak i samband med opptak organisert gjennom Samordna opptak, blir handsama av Nasjonal klagenemnd, jf. universitets- og høyskoleloven § 5-1 sjuande ledd og forskrift om opptak til høyere utdanning § 8-1.

(3) Klager som gjeld opptak etter universitets- og høyskoleloven § 3-6 andre og tredje ledd, blir handsama av Klagenemnda ved Høgskulen på Vestlandet, jf. forskrift om opptak til høyere utdanning § 8-1 andre ledd.

(4) Klage på enkeltvedtak i samband med opptak til studium som ikkje inngår i samordna opptak, blir handsama av klagenemnda ved Høgskulen på Vestlandet, jf. lov om universiteter og høyskoler § 5-1.

Kapittel 9. Utfyllande reglar

§ 9-1 . Utfyllande reglar

Styret, eller det organet styret nemner opp, kan gi utfyllande reglar og retningslinjer innanfor ramma av denne forskrifta.

§ 9-2 . Iverksetjing

Forskrifta trer i kraft 1. januar 2017. Frå same dato blir forskrift 10. mars 2016 nr. 290 om opptak og rangering til mastergradsstudier og videreutdanninger ved Høgskolen i Bergen oppheva.