Delegering av mynde til fylkesmennene etter inndelingslova

Fylkesmannen kan fastsetje at endring av grensene til eit område skal behandlast som ei grensejustering dersom området har mindre enn ti prosent av innbyggjarane i ein kommune som skal leggjast til ein annan kommune etter andre ledd bokstav b, jf. inndelingslova § 3 tredje ledd. Fylkesmannen treff vedtak i mindre saker om justering av kommunegrenser når det er semje om ei løysing, jf. inndelingslova § 6. Dersom kommunegrensa som saka gjeld er del av ei fylkesgrense, skal saka likevel avgjerast av departementet. Fylkesmannen fastset kommunegrenser (på land og i sjø), jf. inndelingslova § 7. Dersom kommunegrensa som saka gjeld er del av ei fylkesgrense, skal saka likevel avgjerast av departementet. I dei sakstypane fylkesmannen har fått delegert mynde til å fatte vedtak etter inndelingslova § 6 og § 7, avgjer fylkesmannen, jf. inndelingslova § 9, om det skal setjast i gang utgreiing på grunnlag av initiativ etter inndelingslova § 8. Fylkesmannen kan avvise søknad frå ein som ikkje har initiativrett, jf. inndelingslova § 9, andre ledd. I dei sakstypane fylkesmannen har fått delegert mynde til å fatte vedtak etter § 6 og § 7, avgjer fylkesmannen om utgiftene ved utgreiinga skal berast av ein eller fleire av dei interesserte kommunane, jf. inndelingslova § 11. Fylkesmannen kan bestemme at den nye kommunen skal følgje krava til godkjenning og kontroll i kommuneloven § 60 nr. 1 og 2 dersom kommunen ikkje kan ventast å dekkje inn meirforbruket frå før samanslåinga innan to år, jf. inndelingslova § 16a. Fylkesmannen kan gjere unntak frå kravet om felles kommunestyremøte etter inndelingslova § 25 i dei tilfella det allereie ligg føre tilstrekkelege lokale vedtak i kvart kommunestyre. Fylkesmannen er mottakar av fråsegn frå fellesnemnda om årsbudsjetta og økonomiplanar for kommunane, jf. inndelingslova § 26, tredje ledd. Fylkesmannen kan gjennomføre lovlegkontroll med budsjettvedtak etter at utgreiing om samanslåing er sett i gang, jf. inndelingslova § 28. Vedtak 19. april 2007 nr. 422 om delegering av mynde til fylkesmennene etter inndelingslova blir oppheva.