Delegering av myndigheit til Longyearbyen Lokalstyre etter forskrift om sortering og innsamling av avfall, avfallsgebyrer og byggavfall i Longyearbyen planområde

Sysselmannen fastsette 11. september i år forskrift om sortering og innsamling av avfall, avfallsgebyrer og byggavfall i Longyearbyen planområde. Forskrifta tek til å gjelde 1. januar 2010. Det følgjer av forskrifta § 8, andre ledd at «Avfallsgebyrets størrelse fastsettes av Sysselmannen eller den departementet bemyndiger».

I brev 9. juli 2002 nr. 5018 delegerte Miljøverndepartementet myndigheit etter svalbardmiljølova § 72 , første ledd og § 15 i forskrift om miljøgifter, avfall og gebyrer for avløp og avfall på Svalbard til Longyearbyen lokalstyre for så vidt gjeld Longyearbyen arealplanområde. Både Sysselmannen og Lokalstyret var samde i at det var mest føremålstenleg å gje reglar om gebyrplikt for avfall i ei felles forskrift om sortering og innsamling av avfall, avfallsgebyrer og byggavfall i Longyearbyen planområde som Sysselmannen har kompetanse til å fastsetje. Miljøverndepartementet oppheva difor Lokalstyret sin kompetanse til å gje forskrifter om gebyrplikt for innsamling av hushaldnings- og næringsavfall, jf. brev av 30. mai 2008. Departementet gjer merksam på at ein her oppheva delegeringen for så vidt gjeld avfallsgebyr, medan delegeringen i brev 9. juli 2002 nr. 5018 også gjeld avløpsgebyr.

I forskrift om sortering og innsamling av avfall, avfallsgebyrer og byggavfall i Longyearbyen planområde heiter det i § 8, andre ledd at «Avfallsgebyrets størrelse fastsettes av Sysselmannen eller den departementet bemyndiger». Når denne forskrifta no er fastsett av Sysselmannen, vil det være mest praktisk at det er Lokalstyret som har kompetansen til å fastsetje storleiken på avfallsgebyret. Miljøverndepartementet delegerer difor med dette kompetanse til å fastsette storleiken på avfallsgebyret til Longyearbyen lokalstyre, jf. forskrift om sortering og innsamling av avfall, avfallsgebyrer og byggavfall i Longyearbyen planområde § 8, andre ledd. Delegeringen gjeld frå det tidspunktet forskrifta tek til å gjelde, dvs. 1. januar 2010.