§ 4. Individuelle sikkerheitstiltak

Individuelle sikkerheitstiltak er tiltak som er tilpassa den enkelte brukar og tilsette sitt behov for fysisk sikring ved opphald på krisesenteret. Følgjande tiltak skal gjennomførast: a) Tilsette skal kartleggje brukaren sitt trusselbilete. Dette gjeld både brukarar som er vaksne og barn. b) Tilsette må, saman med brukaren, vurdere kva sikkerheitstiltak som er naudsynte ved opphald på krisesenteret, og gjere brukar medviten om desse. Dersom tilsette, saman med brukar, finn at det er behov for særskilde sikkerheitstiltak, skal politiet kontaktast. c) I dei høve kor politiet, saman med krisesenteret, finn at den fysiske sikringa ved krisesenteret ikkje godt nok beskyttar brukaren, påleggjast kommunen i samarbeid med lokalt politi å flytte brukar til eit anna sikkert krisesentertilbod. Krisesenteret må gjere ei vurdering av kva anna krisesentertilbod som kan vere aktuelt å flytte brukar til, basert på brukaren sitt sikkerheitsbehov. d) Kommunen skal jamleg sørge risikovurderingar av dei tilsette sitt behov for fysisk sikring. Kommunen bør sjå til at krisesenteret utarbeidar ein plan for den fysiske sikkerheita og gjennomføringa av dei individuelle sikkerheitstiltaka ved krisesenteret etter denne forskrifta. I tillegg bør kommunen sørge for at det ligg føre prosedyre for kartlegging av beskyttelsesbehovet for brukarane.