§ 2-2. Bachelorgrad

(1) Graden bachelor blir tildelt for utdanningar på 180 studiepoeng, tilsvarande tre år, i eit av følgjande studieløp: a) eit fullført treårig studieprogram med 180 studiepoeng som ifølgje rammeplan eller forskrift gir bachelorgrad b) eit fullført treårig integrert studieprogram med 180 studiepoeng (utan rammeplan) som ifølgje vedtak i styret for Høgskulen i Volda gir bachelorgrad c) ein fritt samansett bachelorgrad med eit omfang på 180 studiepoeng, jf. tredje ledd (2) I grunnlaget for graden skal det inngå ei bacheloroppgåve eller eit anna sjølvstendig fordjupingsarbeid. Dette arbeidet kan vere av teoretisk-metodisk, praktisk eller kunstnarisk art, og det kan vere utført individuelt eller i ei gruppe. (3) Det kan etter søknad skrivast ut vitnemål for ein fritt samansett bachelorgrad, med følgjande grunnkrav: a) Graden må innehalde minimum 80 studiepoeng innan same fagområde. Av desse 80 studiepoenga må minimum 20 studiepoeng vere på fordjupingsnivå. b) Graden må innehalde minst éi eining på minimum 30 studiepoeng på eit anna fagområde. c) I grunnlaget for graden skal det inngå ei bacheloroppgåve eller eit anna sjølvstendig fordjupingsarbeid, som skildra i § 2-2 (2). d) Krav om tilknyting og gjenbruk av studiepoeng som følgjer av forskrift om godkjenning av norsk og utenlandsk høyere utdanning og av realkompetanse (godkjenningsforskriften) må vere oppfylte. e) Ein kan berre få utskrive ein fritt samansett bachelorgrad dersom ein ikkje oppfyller krava i § 2-2 (1) a eller b. (4) Studentane har krav på rettleiing i arbeidet med bacheloroppgåva. Det kan stillast som krav at studenten har gjennomført rettleiing for å kunne levere oppgåva. Vilkåra for rettleiing og krava til innlevering av bacheloroppgåve eller anna sjølvstendig fordjupingsarbeid skal gå fram av emneplanen.