Vedtak om endring i instruks om innløysing og regulering av festeavgift i festeforhold der staten eller statleg styrde verksemder eig tomta

I

I instruks 14. september 2007 nr. 1060 om innløysing og regulering av festeavgift i festeforhold der staten eller statleg styrde verksemder eig tomta blir det gjort følgjande endringar:

Nytt punkt 5 skal lyde:

5. Framfeste

Ved framfeste til tomt som oppfyller vilkåra i instruksen punkt 1, kan festar gjere gjeldande krav om innløysing både mot frambortfestar og eigar av tomta, jf. tomtefestelova § 42 fjerde ledd. Føresegnene om innløysing i instruksen punkt 2 gjeld også ved framfeste.

Noverande punkt 5 blir nytt punkt 6 og skal lyde:

6. Ikraftsetjing

Instruksen gjeld frå 1. juli 2008.

For Opplysningsvesenets fond gjeld instruksen frå det tidspunkt då naudsynt endring i lov 7. juni 1996 nr. 33 om Opplysningsvesenets fond er sett i verk.

Merknader til instruksen skal lyde:

Til 1:

Instruksen gjeld for tomter som er eigde av rettssubjektet staten, statsføretak, Opplysningsvesenets fond og andre fond så langt staten eller statsføretak kan gi instruks til fondet. Verksemder som er eigne rettssubjekt er i hovudsak ikkje omfatta av instruksen, med mindre det særskilt går fram av lov eller forskrift at regjeringa har instruksjonsmyndigheit over verksemda, mellom anna Opplysningsvesenets fond og Statskog SF. Denne instruksen gjeld berre for festetomt som er til bustadhus for festaren.

Til 2:

Fyrste avsnitt er likt med grunnvilkåret i tomtefestelova si § 32 om at festaren ikkje kan krevje innløyst ei festetomt til bustadhus før det er gått 30 år av festetida, om ikkje stuttare tid er avtalt.

Den fastsette tidsfristen og innløysingsmåten er lik vilkåret i tomtefestelova § 36, 1. ledd, 1. punktum. Festaren må framsetje skriftleg krav om innløysing. Dette må gjerast seinast eitt år før innløysing kan gjennomførast.

Innløysingsprisen skal ikkje utreknast etter vilkåra i tomtefestelova. Prisen for tomta skal setjast til 30 gonger opphavleg normal festeavgift regulert i samsvar med endringa i pengeverdien, jf. lov om tomtefeste § 15 sjuande ledd. Opphavleg normal festeavgift er den avgifta som vart avtalt som fast festeavgift då festeavtalen vart inngått. Er det til dømes avtalt ei ordning med låg festeavgift dei to fyrste åra, skal det ikkje takast omsyn til slike vilkår i utrekninga.

Til 3 og 4:

Punkta skal kompensere den relativt høge festeavgifta som kan ha vorte ein konsekvens av regulering i perioden 1. januar 2002 til 1. juli 2008.

Til 5:

Punkt 5 er ei naudsynt presisering om framfeste, dvs. der staten eller statleg styrde verksemde leiger bort tomta til eit (eller fleire) mellomledd, som så festar bort tomta. Formålet er at festar i eit framfesteforhold skal kome i same situasjon som festar som har festekontrakt direkte med tomteeigar når det gjeld rett til innløysing. Føresegna i punkt 5 byggjer på regelen i tomtefestelova § 42 fjerde ledd om at festar kan krevje innløysing overfor både tomteeigar og frambortfestar. Føresegna presiserer at instruksen punkt 2 om innløysing også skal gjelde i framfesteforhold.

II

Endringane trer i kraft 1. juli 2008.