§ 7-2. Innhald i rettleiinga

(1) Kandidat og rettleiarar skal ha jamleg kontakt. Rettleiarane har ansvar for å følgje opp den faglege utviklinga til kandidaten. I den årlege framdriftsrapporten skal det stå kor ofte kandidat og rettleiarar har kontakt, jf. § 9-1. (2) Rettleiarar pliktar å halde seg orienterte om framdrifta i arbeidet til kandidaten og å vurdere henne i høve til framdriftsplanen i søknaden, jf. § 5-2. (3) Rettleiarane pliktar å følgje opp faglege forhold som kan medføre forseinka gjennomføring av forskarutdanninga, slik at ho kan gjennomførast på normert tid. (4) Rettleiarane skal gje råd om formulering og avgrensing av tema og problemstillingar, drøfte og vurdere hypotesar og metodar, drøfte resultat og tolkinga av desse, drøfte opplegg og gjennomføring av framstillinga, også disposisjon, språkleg form, dokumentasjon o.l. og gje hjelp til orientering i faglitteratur og datagrunnlag i forhold til bibliotek, arkiv osv. (5) Rettleiarane skal gje kandidaten rettleiing i forskingsetiske spørsmål knytt til avhandlinga.