§ 1-1. Føremål

(1) Studia ved Universitetet i Bergen skal: a) vere forskingsbaserte og legge til rette for studentaktiv læring, b) ha møteplassar mellom studentar og fagleg tilsette, og sørge for at studentane blir integrerte i fagmiljøa, c) gi opplæring i akademisk reielegheit, ytringsfridom og fagkritikk, d) gi den digitale kompetansen som er relevant for fagområdet og e) gi eit godt grunnlag for læring heile livet. (2) Eit klårt og tilgjengeleg regelverk er viktig for at studentane skal verte kjend med dei rettar og pliktar ein har som student ved universitetet, og for å sikre lik praksis på dei ulike fakulteta. (3) Universitetet i Bergen ønsker å legge til rette for utvikling og utprøving av lærings-, undervisings- og eksamensformer som fremjar betre læring.