§ 10-4. Samansetjing av mastergrad

(1) Universitetet i Bergen gir mastergrader med den normerte studietida og innhald som går fram i universitets- og høgskuleforskrifta §§ 2-6 til 2-11. (2) Graden master kan berre tildelast studentar som har fullført eit masterprosjekt. (3) Masterprosjektet skal vere eit sjølvstendig vitskapleg eller kunstnarisk arbeid på mellom 30 og 60 studiepoeng, utarbeidd under rettleiing. Fakultetet kan i emneskildringa vedta at to eller fleire studentar kan samarbeide om masterprosjektet. (4) Integrerte masterprogram skal ha krav om examen philosophicum. Masterprosjektet i eit integrert masterprogram kan vere på 20 studiepoeng, jf. universitets- og høgskuleforskrifta § 2-8. (5) Masterprosjektet er i utgangspunktet offentleg og ope for innsyn, med dei avgrensingar som følger av teieplikta (forvaltingslova § 13 med vidare), forskingsetiske omsyn og vedtak om klausulering. Fakultetet vedtar i første rekke om eit masterprosjekt er underlagt teieplikt, og etter grunngiven søknad om eit prosjekt skal underleggast tidsavgrensa klausulering på maksimalt fem år. Universitetet i Bergen skal ikkje inngå avtalar om hemmeleghald som avgrensar studentens rett til sensur.