§ 5-2. Permisjon

(1) Studentar har rett til permisjon: a) i høve svangerskap, fødsel og omsorg til barn i samsvar med universitets- og høgskulelova § 10-6 (2). b) ved sjukdom som ikkje gjer det mogeleg å halde fram studia, c) dersom sambuar mv. eller barn er alvorleg sjuke, d) i høve utføring av tenesteplikt etter forsvarslova § 17, e) i høve verv i studentpolitiske organ og andre tyngande politiske verv eller f) når andre særskilde forhold talar for, til dømes toppidrett. (2) Permisjon inneber at den ytre ramma for studieretten blir utvida i tid tilsvarande som permisjon, medan studieretten blir haldt ved like. Permisjonar blir innvilga for eitt eller to semester om gongen. (3) Etter permisjonen har studenten rett til å ta opp att studia der hen slapp, så langt det gjer seg gjere. Utdanningsplanen skal oppdaterast for å ta høgde for permisjonen. (4) Søknad om permisjon må meldast til fakultetet så snart råd, og skal dokumenterast på høveleg måte. (5) For permisjonssøknader etter første avsnitt bokstav a til c inneber dokumentasjonsplikta fråsegn frå lege, eller anna helsepersonell som nemnd i Forskrift om unntak frå legeerklæringsvilkåret. Dokumentasjon knytt til permisjonssøknad etter bokstav b og c skal gjere greie for helsetilstanden og stadfeste at gjennomføringa av studia er umogleg eller urimeleg å vente.